Accessibility links

Кайнар хәбәр

Rice Ğiraqqa kilde


AQŞ däwlät sekretare Condoleezza Rice Kirkukta jurnalistlar belän oşraça, 18.12.2007
AQŞ däwlät sekretare Condoleezza Rice Kirkukta jurnalistlar belän oşraça, 18.12.2007

Sişämbedä Quşma Ştatlar däwlät sekretare Condoleezza Rice aldan iğlan itelmägän säfär belän Ğiraqqa kilde. Säfären ul başqala Bağdadtan tügel, ä tönyaqtağı Kirkuk şähärennän başladı.

Rice xanımnıñ başlap näq menä Kirkukka kilüe yuqqa tügel. Neftkä bay, törle din häm millät wäkille yäşägän bu töbäk Ğiraqnıñ kiläse darı miçkäsenä äylänergä mömkin. Quşma Ştatlar monı buldırmasqa, töbäktäge kierenkelekne kimetergä, häm bu niäten açıqça kürsätergä tırışa.

"Quşma Ştatllar bu äxämiätle töbäkneñ kiläçäge öçen borçıla. Kirkuk töbäge bik moxim" dide däwlät sekretare.

Ğiraqnıñ elekke citäkçese Säddam Xösäyen bu töbäktä "ğäräpläşterü" säyäsäte alıp bardı. Distälägän meñ körd häm başqa ğäräp bulmağan xalıqlar torğan cirlärennän kitergä mäcbür buldı. Alar urınına Ğiraqnıñ üzäk häm könyaq töbäklärennän ğäräplär küçerep kiterelde.

Kördlär, neftkä bay bu töbäkne üz tufrağı dip sanıy. Kirkuk şähären alar üzläreneñ başqalası, xättä "Körd İerusalimı" dip atıy. Kirkuk häm anıñ tirä yağın alar Körd avtonom töbägenä quşırğa teli. Äytkändäy, 2005 yılda qabul itelgän Ğiraqnıñ yaña konstitutsiäsendä bu töbäktä xalıq sanın alu häm bu mäsälädä referndum ütkärü qaralğan.

Töbäktäge ğäräp häm törkmän oppozitsiäse referendum ütkärügä qarşı çığa. Bağdadtağı räsmilär dä referendum töbäkräge kierenkelekneñ tağı da aruına kiteräçäk dip qurqa. Körd räsmiläre Bağdadnı referendumğa ayaq çalu niätendä ğäyepli.

Rice xanımnıñ Kirkukka säfäre şuşı säyäsi qarşılıqlarnı kimetüne maqsat itep quya.

Kirkuknıñ äxämiäten azsızıqlağan tağın ber misal: äle genä anda Berläşkän Millätlärneñ maxsus wäkile Staffan de Mistura bulıp kitte. Düşämbedä İrbil qalasında yasağan çığışnda ul referendumğa äzerlkne tizäytergä çaqırdı:

"Aldağı 6 ay eçendä Berläşkän Millätlär yärdäme belän konstitutsiäneñ 140nçı matdäsen ğämälgä quyarğa kiräk" di Berläşkän Millätlär wäkile.

Ul arada Törkiä xärbiläre Ğiraqnıñ tönyağında körd suğışçılarına qarşı çiklängän külämdä xärbi ğämällären däwam itä. Düşämbedä bulğan hawa höcümennän soñ sişämbedä 300läp xärbi Ğali Raş töbägendä çiktän 3 çaqırım eçkä kergän dip xäbär itelä.

Ğiraq Kördsätanı räsmiläre bu ğämällrgä täniqt belderde.
XS
SM
MD
LG