Accessibility links

шимбә, 10 декабрь 2016, Казан вакыты 17:55

Çärşämbedä Berläşkän Millätlär İminlek Şurası Kosovo mäsäläsen tikşerä. 1999 yıldan birle BMO idaräsendä bulsa da, bu töbäk formal räweştä Serbiäneñ ber öleşe bulıp qala. Töbäkneñ kiläçäk statusı turında Belgrad belän Priştina arasında barğan söyläşülär näticä birmäde. New York utırışında Serbiä häm Kosovo albannarı citäkçeläre dä qatnaşa.


İminlek Şurası "troika" dip atalğan aradaşçılar törkeme äzerlägän xisapnı tikşerer dip kötelä. Bu törkemgä Quşma Ştatlar, Yewropa Berlege häm Rusiä wäkilläre kerä. Belgrad belän Priştina arsında 2 yıl barğan söyläşülär näticä birmäde. Här taraf üzenekendä qaldı. Belgrad Kosovoğa kiñ külämdä möstäqillek birergä äzer, läkin bäysezlekkä qarşı çığa. Kosovo albannarı isä bäysezlektän başqa närsägä riza tügel.

Kosovo prezidentı Fatmir Seydiu küptän tügel radiobızğa birgän äñgämäsendä, Kosovo albannarınıñ küpçelege monıñ öçen här qorbanğa äzer dide:

"Kosovo Serbiäsez, anıñ belän bulğan iqtisadi elemtälärsez yäşi ala. Serbiä bezne sınarğa tırışa. Yağni, blokada kertsä, bezneñ qarşı torırlıq köçebez, başqa mömkinlegebez barmı-yuqmı. Bez moña äzer. Kosvo xalqı bäysezlekne satıp alıp bulmağanın belä. Ägär Serbiä köç qullanırğa uylasa, ul kemgä qarşı toraçaq? NATO köçläre Kosovoda köç qullanuğa yul quyılmayaç dip kisätep quydı" di Kosovo prezidentı.

Kosovo citäkçeläre bu fikerlären İminlek Şurasında da äyter dip kötelä. Ämmä Şuranıñ üzendä fiker büleneşe küzätelä.

5 daimi äğzanıñ öçese – Fransiä, Britaniä häm Quşma Ştatlar – söyläşülär waqıtı üzdı, Kosovo mäsäläsen xäl itergä kiräk digän fikerdä.

Qalğan ikese – Qıtay häm, bigräk tä, Rusiä - Kosovonıñ bäysezlegenä qarşı çığa häm söyläşülärne däwam itergä çaqıra.

Rusiä prezidentı Vladimir Putin, qat-qat, Kosovoğa bäysezlek birelsä, bu şulay uq bäysezlek telägän Könyaq Osetiä, Abxaziä, Dnestr buyı töbäklärenä ürnäk bulaçaq, dip kisätte.

Tışqı eşlär ministrı Sergei Lavrov Kosovonıñ bäysezlek iğlan itüe qurqınıç näticälärgä kiteräçäk digän ide:

"Kosovonıñ beryaqlı bäysezlek iğlan itüe häm monıñ qanusız tanıluı ezsez qalmayaçaq, çönki bu Balkanda häm başqa töbäklärdä etärgeç biräçäk. Bu plannar belän yäşägän keşelär, monıñ näticäse öçen cawaplı bulırğa tieş" dide Rusiäneñ tışqı eşlär ministrı.

Şuşı qarşılıq alğa taba da däwam itsä, Quşma Ştatlar häm Yewropa Berlege dilbegäne üz qulına alırğa mömkin.

Uzğan atna Brusseldä ütkän sammitta Yewropa Berlegeneñ 27 il citäkçese Kosvo söyläşüläre näticiä birmäde, anıñ xäzerge statusı ozaqqa däwam itä almıy, digän näticä yasağan ide.

Yewropa diplomatları, üzara söyläşkändä, Berlekneñ bar illäre dä, Qıprısnı sanamağanda, Kosovoğa bäysezlek birergä äzer dip belderä.

Yewropa illäre Kosovoğa, xäzerge BMO idaräse urınına 1800 keşelek tınıçlıq saqlaw köçlären cibärergä kileşte.

Räsmi Waşington da Kosovonıñ kiläçäge mäsäläsendä şul uq qaraşta tora.

Bu wağziättä Kosovo citäkçeläre Brussel häm Waşington belän kileşep eş itäçägen belderä.


XS
SM
MD
LG