Accessibility links

Кайнар хәбәр

Prezidentlıq yarışında 6 namzät


Yäkşämbe könne Rusiäneñ üzäk saylaw komissiäse prezidentlıqqa 6 namzät däğwa itäçäk, dip belderde.


Kiläse yıl 2 martta ütäçäk prezident saylawlarında namzät bulıp premyer-ministrnıñ berençe urınbasarı Dmitriy Medvedev, kommunistlar yulbaşçısı Gennady Zyuganov, liberal-demokratlar başlığı Vladimir Jirinovsky, elekke premyer Mixail Kasyanov, Uñ köçlär berlege räise Boris Nemtsov häm demokratik partiä yulbaşçısı Andrei Bogdanov qatnaşaçaq, dip xäbär itte üzäk saylaw komissiäse.

Medvedevnı Berdäm Rusiä häm Ğadel Rusiä firqaläre, Zyuganov belän Jirinovskynı – üz partiäläre täqdim itte. Bu 4 firqadän tış Rusiäneñ Däwlät Dumasında başqa säyäsi köç yuq, şuña kürä Üzäk saylaw komissiäsendä alarnıñ namzätläre avtomatik räweştä terkälde.

Qalğan 3 namzät 16 ğinwarğa qadär 2 million imza cıyıp alarnı komissiägä tapşırırğa tieş. Uñ köçlär berlege mäğlümatlärenä qarağanda, bu mömkin tügel, ölgerer öçen könenä yaqınça 100 meñ imza cıyarğa kiräk.

Bukovsky prezent saylawlarında qatnaşmayaçaq
Şimbä könne üzäk saylaw komissiäse 7 bäysez namzätneñ ğarizasın terkämäde, alarnıñ berse – äle sovet çorında uq ildän kitkän, xäzer Britaniädä yäşäwçe yazuçı Vladimir Bukovskynıqı ide. Anı namzät itep terkämäwgä komissiä 3 säbäp kiterde:

Ul soñğı 10 yılnı Rusiädä yäşämägän, namzät isä Rusiädä yäşägän keşe bulırğa tieş. Bukovsky – Rusiä watandaşı tügel, ä Britaniä watandaşı, häm öçençe säbäp – Bukovsky üzeneñ yazuçı bulğanın dälilli almağan. Bu säbäplär Bukovskynıñ internettağı säxifäsendä kiterelgän.

Yazuçı üze bu qararnı – säyäsi qarar dip atadı, dip yaza Moscow Times basması. Yabloko firqase saylawlarda Bukovskynı yaqlayaçağın xäbär itkän ide. Komissiäneñ anı yarıştan töşerü qararınnan soñ Yabloko üz tarafdarların saylawlarda qatnaşmasqa çaqırırğa mömkin.

Ni genä bulmasın, 2 mart saylawlarında Dmitriy Medvedev ciñär dip farazlana, dip däwam itä mäqäläsen Moscow Times basması.

Comğa könne saylaw komissiäseneñ üzendä bulğan ber üzgäreş tä mäğlümat çaraları iğtibarınnan çittä qalmadı. Putin komissiägä yaña äğzä bilgeläde. İgor Federov urınına ul üz administrasiäseneñ eçke säyäsät bülege başlığı urınbasarı Leonid İlvevnı quydı. Kommersant gazetası yazuınça bu Kremlneñ komissiä östennän kontrolen tağın ta arttıraçaq.

Matbuğat bu könnärdä Putin häm anıñ warisı sanalğan Medvedevnıñ säyäsättän tış şöğelläre turında da yazdı.

Dzüdo köräşendä qara bilbaw däräcäsenä iä bulğan Putin dzüdo turında DVD çığarğan. Döresräge bu künegülärne dönya häm Olimpiä uyınnarı çempionı Yasuhiro Yamaşita häm Vladimir Putin bergä äzerläp töşerep DVD yasağan.
İke yıl elek Putin häm Yamaşita Piterburda, elek Putin uqığan mäktätä dzüdo däresen birgän ide. Soñğı tapqır ul Yamaşita belän küptän tügel Yaponiägä bulğan säfäre waqıtında küreşkän bulğan. Dzüdo öyränüçelär öçen DVD däresen alar berniçä yıl elek äzerlägän bulğan.

Dmitriy Medvedev yoga belän şöğellänä ikän. Piterburdağı yoga üzäge räise Borodayenko süzlärenä qarağanda, "anıñ yoga belän şöğellänüe şunda uq kürenä – ul töz gäwdäle, yöze tınıç. Aña yal iter öçen 15-20 minutlıq künegü dä citä," di yoga üzäge başlığı.

XS
SM
MD
LG