Кыргызстан рәсмиләре моңарча исеме булмаган бер тауга Санта Клаус исеме кушкан. Дәүләтнең туризм идарәсе башлыгы Турусбәк Мамашев сүзләренә караганда, Санта Клаус тавы Нарын белән Ош өлкәләре чигендә урнашкан, аның биеклеге – 4,5 мең метр. Тау башына Кыргызстан байрагы куелган. Шулай ук Мамашев сүзләренә караганда, 30 декабрьдә Бишкәктә Санта Клаус фестивале үтәчәк, чарада 3 меңләп Санта Клаус катнашачак.