Accessibility links

пәнҗешәмбе, 8 декабрь 2016, Казан вакыты 07:02

Gruziädä säyäsi cancal qıza bara. İmedi tapşıruların tuqtattı


İmedi TV kompaniäseneñ säyäsi tapşırular citäkçese Georgi Targamadze

İmedi TV kompaniäseneñ säyäsi tapşırular citäkçese Georgi Targamadze

Prezident saylawğa ber atna qala Gruziä yänä säyäsi cancalğa kerep battı. Prezidentlıqqa namzät millarder Badri Patarkatsişvili, saylaw waqıtında xärämläşügä dalil kiterep, xökümätne bärep töşerü niätendä ğayeplänä. Üze ul Gruziä räsmilären anı üterü niätendä ğayepli. Şuşı "pıçraq säyäsi uyınnarğa" protest yözennän, İmedi telekompaniäse tapşıruların waqıtlıça tuqtatuın belderde.


Gruziäneñ oppozitsiädäge iñ abruylı İmedi telekompaniäse soñğı ike ayda efirdan inde ikençe tapqır çığa. Noyäber ayında Gruziä räsmiläre bu kompaniäne xökümätneñ bärep töşerelüen xuplawda ğayeplägäç, ul ber aydan artıq waqıtqa tınırğa mäcbür bulğan ide.
Xäzer kompaniä tapşıruların üze tuqtata. İldäge "pıçraq säyäsi uyınnarğa" protest yözennän. İmedineñ säyäsi tapşırular citäkçese Georgi Targamadze bu adımnı ber yaqtan, xezmätkärlärgä bulğan basım, ikençe yaqtan, kompaniäneñ xujası häm prezidntlıqqa namzät Badri Patarkatsişvilidan çitläşü niäte belän añlata:

"Qabat äytäm, bu kompaniäne yabu tügel, barı tik tuqtatıp toru. Bu adım belän bez pıçraq säyäsättän çitläşergä telibez. Bu protest ber yaqtan xezmätkärlärgä basım yasağan xökümätkä qarşı, ikençe yaqtan, kompaniä xujası saylawda qatnaşuı säbäple kilep tuğan wazğiätkä qarşı" di İmedineñ säyäsi tapşırular citäkçese.

Badri Patarkatsişvili
Prezident Mixail Saakaşviliğa açıqça qarşı çıqqan İmedi xucalarınıñ berse Badri Patarkatsişvili tiräsendä cancal könnän-kön köçyä bara.

Sişämbedä baş prokuror urınbasarı Nikolay Gvaramia alarda Patarkatsişvili tawışı yazılğan tasma buluın äytte. Yänäse ul anda Eçke eşlär ministrlığı Erekle Koduağa 100 million dollar täqdim itä.

"Alarnıñ planına kürä, Kodua, saylawdan soñ ikençe köngä cämäğätçelekkä yalğan bülletennär tutırılğan ike qapçıq kürsätergä tieş bulğan. Yänäse, xökümät aña alarnı tartmağa salırğa quşqan, ä ul "çın patriot" bularaq, moña barmağan. Şuşı wazğiättä ul ministrlıqta xakimiätne üz qulına alırğa tieş bulğan" di baş prokuror urınbasarı.

Tasmadağı tawış kemneke ikäne äle raslanmasa da, ul däwlät televideniesendä yañğıratıldı, häm kiläse atna ütäçäk saylaw aldınnan saylawçığa yoğıntısın yasadı bulsa kiräk.

Üz näübätendä Patarkatsişvili yağı xökümätne ğayepli. Anıñ saylaw kampaniäsen, 2005 yılda säyer şartlarda wafat bulğan premier-ministr Zurab Jvaniäneñ enese Giorgiy Jvania citäkli.

"Xökümät bezne pıçraq uyınğa tartıp kertmäkçe. Yalğan mäğlümät, propaganda belän. Alar Patarkatsişvilinı provakatsiä, köç qullanırğa telägän yawız niätle avantuyrist itep kürsätergä tırışa. Min cawaplılıq belän äytäm: yaqın könnärdä cämäğtçelek barısın da beläçäk" di Giorgiy Jvania.

Ul arada Patarlatsişvili üze dä ber tasma bäyän itte. Yänäse anda Eçke eşlär ministrlığı räsmie kemgäder Patarlatsişvilinı üterergä quşa.

Prokuratura bu ğayepläwlärne tikşereräçägen belderä. Ämmä xäzerge waqıtta Londonda yäşäwçe Patarkatsişvili, bu ğayepläwlärne sıltaw itep, soraw aluğa Tifliskä qaytmas di.

Patarkatsişvili 5 ğinwar saylawında üzen Saakaşviliğa qarşı torırlıq berdän-ber namzät dip sanıy. Oppozitsiädäge qalğan namzätlärneñ mömkinlege İmedi eşläwdän tuqtağannan soñ, yuq däräcäsendä.
XS
SM
MD
LG