Accessibility links

сишәмбе, 6 декабрь 2016, Казан вакыты 11:07

Bhuttoğa qorallı höcüm parlament saylawına äzerlänü uñayınnan uzğan cıyınnan kitep barğanda yasala, soñraq ul yaralardan dönya quya. Pakstannıñ Rawalpindi şähärendä bulğan şuşı höcüm bar ildäge totrıqlılıqnı şik astına quya.

Xatın-qızlarnıñ islam illärendä dä iñ yuğarı däwlät urınnarına kütärelä aluı, yäğni alarnıñ ir zatlar belän ber xoquqta buluı xaqında bäxäsläşkändä berençe misal itep härwaqıt diärlek Pakstannıñ elekke premyer-ministrı Binäzir Bhutto oçrağı kiterelä ide. Xäzer inde şuşı olı xanım turında söylägändä märxümä süzen qullanırğa turı kilä - atnakiç Pakstannıñ Rawalpindi şähärendä uzğan saylawğa äzerlek cıyınında Binäzirgä qorallı höcüm yasaldı häm şunda alğan yaralarınnan ul soñraq xastaxanädä wafat buldı.

Alınğan xäbärlärgä qarağanda, Binäzir Bhutto şul cıyınnan inde kitep barğan mäldä aña ber adäm ut aça häm şunnan soñ üz-üzen şartlata. Yaralanğan Bhutto şunda uq xastaxanägä kiterelä, ämma operatsiä waqıtında can quya. Xäbärçelärgä monı berençe bulıp Binäzirneñ advokatı, senator Bäbär Äwän belderde:

"Min äle genä xirurg, doktor Mosadıyq belän söyläştem, häm ul Binäzir Bhuttonıñ şähid kitüen rasladı", dip xäbär itte Binäzir wafatın Bäbär Äwän.

Binäzir Bhutto islam dönyasında berençe premyer-ministr bularaq ant itü tantanasında, 2.12.1988

Prezident Möşärräf xakimiätenä qarşı torğan oppozitsiä citäkçelärennän iñ abruylı bulğan şuşı olı xanımğa 54 yäş kenä ide. 80-nçe häm 90-nçı yıllarda ul inde Pakstan xökümätlären citäkläde, şunnan soñ Bhutto rişwätçelektä ğäyeplänep, ildän kitärgä mäcbür buldı häm Pakstanğa kire 8 yıl sörgendä yäşägännän soñ şuşı yılnıñ üktäbrendä genä qayta aldı.

Ul citäklägän Pakstannıñ xalıq partiäse ğinwarğa bilgelängän parlament saylawında zur uñışqa ireşer dip farazlanğan ide. Xäzer bu farazlarğa inde başqaçaraq qararğa kiräk bulaçaq, saylaw ütkärü üze şik astında.

Pakstanğa kire qaytqannan birle Binäzir ülem yanawları alıp tordı, alar berençe çiratta islamçılar yağınnan kilä ide. Ul sörgennän qaytqan könne ük, Qaraçı şähärendä cıyılğan tarafdarların sälämlägändä ber intixar höcümçe bomba şartlatıp 139 keşene ütergän ide.

Binäzir Bhuttonıñ bar ğailäse faciğäle yazmış kiçergän ber ğailä. Anıñ ätise - Zölfikär Ğali Bhutto 1979-nçı yılda Pakstan xärbiläre tarafınnan asıp üterelgän ide. 1980-nçe yılda anıñ abıysı Şahnäwaz Fransiädä bik säyer şartlarda üterelde. 1996-nçı yılda anıñ ikençe abıysı da üterelde.

Binäzir üzeneñ dä şundıy dähşätle yazmışqa duçar bula alaçağın yaxşı añlıy ide, ämma ul üzeneñ berqayçan da ülemnän qurıqmawın belderep kilde. Azaqta Binäzir Bhuttonıñ şul turıdağı ber belderüennän özek kiteräse kilä - anda märxümä, "ägär dä Pakstannı, andağı demokratiäne saqlaw ğömerebezne häm ireklegebezne qorban itüne añlata ikän, bez moña riza, bez fäqät böyek millätebezne islamçı suğışçılar qulına qaldırırğa ğına riza tügel", dip äytkän ide.

XS
SM
MD
LG