Accessibility links

җомга, 9 декабрь 2016, Казан вакыты 22:28

Yaña yılğa Rusiädä yaña "Yazmış şuqlığı"


Akterlar Konstantin Xabenskiy Kostya (L) häm Yelizaveta Boyarskaya Nadya rolendä

Akterlar Konstantin Xabenskiy Kostya (L) häm Yelizaveta Boyarskaya Nadya rolendä

Elekke Sovetlar berlegendä distä yıllar buyı här Yaña yıl aldınnan qabatlana torğan ber ğädät bar ide. 31 dikäber könne millionlağan keşe televizor aldına utırıp "İronia sudbı" ("Yazmış şuqlığı") digän film qarıy ide. 1975 yılda töşerelgän, sovet tormışınıñ bertörlelegen osta tänqitlägän bu film küplär öçen Yaña yıl qarşılawnıñ ber öleşe ide. Rejisser Timur Bekmambetov bıyıl şul filmnıñ däwamın töşerde.


Elekke sovet berlegendä yäşägän häm bu köyne işetmägän keşe yuqtır. Millionlağan ğailä distä yıllar buyına yaratıp qarağan, yıl sayın kötep alğan filmnar dönya mädäniätendä siräk küreneş. Tanılğan rejisser Eldar Ryazanov töşergän "Yazmış şuqlığı, yä isä Ciñel par belän!" digän film şundıylarnıñ berse.

Filmnı kürgän keşelär anıñ eçtälegen yattan belä. Jenya isemle urta yäşlärdäge ir-at Mäskäw munçasında dusları belän yaña yılnı yaxşı ğına qarşılağannan soñ, yalğışlıq belän, ber iptäşe urınına Leningradqa baruçı oçqıçqa utırtılıp cibärelä.

Sovet tormışınıñ bertörlelege xättä arxitekturada çağılış taba. Ber ük törle uramnar, yortlar, fatirlar. Üz öyemä dip qaytqan Jenya, uyanıp kitep küzen açsa, Nadya isemle ber xanımğa tap bula. Maxmırdan başı qatqan Jenya üzeneñ çit fatirda yatuın tanırğa telämi.

Menä şulay, drama qatış komediä itep yasalğan, sovet tormışınıñ bertörlelegen tänqitlägän bu film Brejnev çorınıñ ber sağışlı sürätenä äylände. Şuña da, çığışı belän qazax, Rusiäneñ tanılğan rejisserına äylänägän Timur Bekmambetovnıñ şuşı klassik filmnıñ däwamın töşerüe küplär öçen kötelmägän buldı.

"Yazmış şuqlığı. Däwam" dip atalğan yaña film konoteatrlarğa 21 dikäber çıqtı. Ul çınlap ta Jenya häm Nadyanıñ ğişıq tarixınıñ däwamı bulıp tora. Läkin alar qawışmağan. Nadya üzeneñ elekke yörgän yegetenä kiyäwgä çıqqan, şulay uq, Nadya isemle qızı üsterä. Jenya da Mäskäwgä qaytıp öylängän, anıñ Kostantin isemle ulı bar.

Yaña filmda Jenyanıñ munça dusları bu yulı anıñ üzen tügel, ä ulın, xäzer inde Peterbur şähärenä ozata. Konstantin belän yäş Nadya arasında ğışıq başlana.

Küp kenä tänqitçelär, yaña film çıqqançı uq, klassikanı yañartu tırışlığına tänqit belderde häm yaña filmnı iskeseneñ uñışsız şäwläse, dip aña tiskäre bäyä birde.

"Älbättä ul, ixlaslığı belän dä, ütemlelege belän dä berençesenä ottıra. Läkin barıber, geroylar, Sovetlar berlege belän awır yıllardan soñ närsä bulğanın belergä tırışu - qızıqlı" di tänqitçe Dmitriy Bıkov.

Qayber tänqitçelär fikerençä, berençe filmda bulğan säyäsi satira, yañasında kommersiä belän alıştırılğan. Äytik, geroylarnıñ berse Beeline isemle telefon şirkätendä eşli. Çınbarlıqta bu şirkät filmnıñ töp sponsorlarınıñ berse.

Yaña filmda xättä prezident Putin kürenep kitä, televidenie aşa xalıqqa yaña yıl qotlawın ireşterä.

Jenya häm Nadya rollären şul uq akterlar – Andrey Myagkov belän Barbara Brılska başqara.
XS
SM
MD
LG