Accessibility links

шимбә, 10 декабрь 2016, Казан вакыты 19:34

Pakstan saylaw kommisiäse bügen saylawnın, Bhuttonıñ üterelüennän soñ çıqqan nizaqlar säbäble 18 fevralgä qadär kiçekterelüen iğlan itte.

Pakstan saylaw kommisiäse kiçä bulırğa tiyeşle cıyınnı -partia başlıqları belän kübräk kiñäşläşer öçen - bügengä kiçekteregä bulğan ide. Bügen komissiä saylawlarnıñ, Bhuttonıñ üterelüennän soñ çıqqan nizaqlar säbäble - 18 Fevralgä qadär kiçekterelüen iğlan itte. Oppozisiä isä saylawlarnıñ planlaştırılğança, 8 ğinvarda yağni üz waqıtında buldırıluın telägän ide.

Pakstan saylaw komissiäse başlığı, Qazıy Möxämmäd Faruq İslamad şähärendä bügen matbuğat aldında yasağan çığışında komissiä qararın bolay iğlan itte:

“Pakstanda saylawlar, 8 ğinvarda tügel, 18 fevral 2008 tarixında bulaçaq”

Komissiä başlığı şul uq waqıtta, bu saylawlarnıñ, “açıq, döres häm bäysez” bulaçağına ışandırdı. Häm ul barlıq partiälärne bu kiçekterüne qabul itep - saylawlarda qatnaşırğa çaqırdı.

Yäqşämbe könne, Binäzir Bhutto citäklägän Pakstan xalıq partiäseneñ yaña citäkçese itep märxümä Bhuttonıñ xälal cifete Asif Ali Zardari belän anıñ 19 yäşlek ulı Bilalwal saylanğan ide. Häm partiäneñ yaña başlıqları Pakstan saylawlarına qatnaşaçaqların belderde, Partiä saylawlarnıñ aldan planlaştırılğança 8 ğinvarda buluın xuplıy ide. Kiçä partia başlığı Zardari, ikençe oppozisiä partia başlığı Nawaz Şärifneñ dä bu qaraşta buluın belderde.

“Nawaz Şärif tä saylawlarnı kiçekterelmäwe kiräklege turında minem belän ber ük fikerdä.”

Başta saylawlarnın kiçekterelüe mäsäläsendä qararsız bulğan oppozisiä partiaları, xäzer ber tawıştan saylawlarnın kiçekterelmiçä üz waqıtında buluın teli. Alar şulay uq, prezident Pärwäz Möşärräfneñ saylawnı kiçekterü belän wazğiyätne üz mänfäğatenä qullana alaçağına borçıla.

Könbatış häm Amerika, ildä demokratiäne yañadan torğızu maqsatında saylawlarnı planlaştırılğança waqıtında, 8 ğinvarda buldırırğa çaqırğan ide.

Läkin bu, ildäge qatlawlı wazğiätne haman da üzgärtä almıy. Saylawlarnıñ ber awızdañ xuplanğança waqıtında uzdıru eşlärne tağında qatlawlandıra ala digän farazlar da bar.

Pakstan, xalıq Bhuttonıñ üterelüenä protest belderä
Bhuttonıñ üterelüennän soñ könyaq Sind wilayätlendä qabınğan ğisyan xäräkätendä, Bhuttonı yaqlawçılar açuların, saylaw üzäklärenä höcüm belän tınıçlanırğa teläsä, alar şul uq waqıtta Bhuttonıñ ildä säyäsi yoğıntısına da ziyan kiterdelär. Näticädä kibetlär talandı, şaqtıy küp sanda yaralanuçılar häm ülüçelär buldı. Xaqimiät kontrolne arttırdı häm ğisyançılar qulğa alındı.

Saylaw isemlek qäğazlären äzerläw, saylaw tartmaların törle saylaw üzäklärendä urnaştıru kebek saylaw aldı äzerlekläre dä bu nizaq waqıtında totqarlandı. Saylawlarğa bu şartlarda äzerlängän ildä, saylaw axırı da ällä ni yaqtı kürenmi. Äytik, saylawlarda Pakstan xalıq partiäse ciñep çıqsa, premyer itep kem bilgelänäçäge äle xäl itelmägän. Zardari üze törle korupsiä eşläre belän ğayeplänsä, anıñ 19 yäşlik ulı Bilalawal äle ul täxetkä utıru öçen bik yäş. Bu oçraqta partiä citäkçese yärdämçese Mäxdüm Ämin Fähim bilgeläner dip farazlana.

Xäzergä saylaw köne bilgele bulsa da moña partialar häm xalıqara cämäğatçelek niçek qarar? Qısqası, xäzerge waqıtta qarşılıqlar häm talawlar belän çayqalğan Pakstan uramnarında barı tik bilgesezlek genä xöküm sörä.


XS
SM
MD
LG