Accessibility links

җомга, 9 декабрь 2016, Казан вакыты 06:52

Yaña yıl Yewropa Berlegenä ber yañalıq alıp kilde - aldağı yartı yıl eçendä aña Sloveniä räislek itäçäk. Monıñ üzençälege närsädä soñ, digän soraw tua ala.

Eş şunda ki, räislek wazifaların üz östenä elek "timer pärdä"neñ sovet blogı yağında torğan, Yugoslaviädän bäysezlek alıp Yewropa Berlegenä küptän tügel genä quşılğan il ala. Şuşı eşendä Sloveniä Berlekneñ tışqı säyäsättäge iğtibarın Balkannarğa, bigräk tä bäysezlek dawlağan Kosovoğa yünältä ala.

Yewropa Berlegenä räislek itü beryaqtan zur däräcä dä, ämma berük waqıtta zur yök tä bulıp tora. Citäkçelek eşen yartı yılğa üz qulına alğan il bar Berlekneñ eçke häm tışqı säyäsättäge yünäleşen saqlaw öçen cawaplı.

Şuña da räislekne yaña äğzalar arasınnan berençe bulıp alğan Sloveniä zur sınaw aldında tora - tieşle täcribäse bulmasa da, ul xäzer bar Berlekneñ säyäsäte öçen cawaplı. Aña qädär räis bulıp torğan Portugaliä Sloveniäneñ eşen küpmeder ciñeläytte: Yewropa Berlege öçen iñ qatlawlı sanalğan mäs'äläne - Berlek äğzaları arasında yaña kileşü tözü ölkäsendä urtaq qaraşqa ireşep, dikäberdä anı imzalata aldı. Eçke frontta, şulay itep, Sloveniä öçen awırlıqlar ällä ni kötelmi.

Ä menä Yewropa Berlegeneñ tışqı säyäsätendä iğtibar yünäleşe üzgärer dip kötelä. Räis il, ğädättä, bu ölkädä üz östenleklären alğa sörä ala. İspaniä räislek itkändä, misal öçen, Berlek Urta diñgez tiräsendäge Afrika illäre - Mäğrib belän mönäsäbätlärne nığıtuğa zur iğtibar birgän ide, Portugaliä üz çiratında, portugal telendä söyläşkän Braziliä, häm şulay uq Afrika belän mäşğül buldı.

Ä inde Sloveniä, üzeneñ qayda urnaşuın istä totıp, Yewropa Berlegeneñ Balkan illäre, bigräk tä Kosovo belän tığızraq eş itüen alğa sörer, dip kötelä.

İlneñ tışqı eşlär ministrı Dimitri Rupel monı inde dikäberdä ük xäbär itep quydı:

"Min, şuşı räislek waqıtında bez Kosovo mäs'äläsen xäl itügä öleş kertä alırbız, dip ömetlänäm. Bu ölkädä soñğı aylarda bulğan täräqqiätne küzdä totqanda, Sloveniä räislege waqıtında ütä qatlawlı protseslar belän eş itäçäk, häm min bezneñ räislek azağına şul protseslar inde tögälläner dip uylıym", digän ide Sloveniäneñ tışqı eşlär ministrı Rupel.

Sişämbedä Dimitri Rupel, "könbatış Balkanğa Yewropa perspektivasın kürsätü kiräk", dip belderde. Anıñ süzlärenä qarağanda, bu Yewropanıñ, 20nçe ğasır azağındağı waqiğälärdän intekkän şuşı öleşen totrıqlandıruğa Sloveniä kertkän öleş bulaçaq.

Könbatış Balkan digändä ğädättä Xorvatiäne, Montenegro (Çernogoriäne) häm xäzer inde Kosovonı da küz aldında totalar.

Priştina belän Belgrad arasındağı söyläşülärneñ uñışsız tämamlanuınnan soñ Kosovo üzeneñ bäysezlegen iğlan itärgä cıyına. Häm Sloveniä şuşı küçeşneñ tınıç qına, caylı ğına uzuın garantiälärgä tieş bulaçaq. Çönki Kosovo mäs'äläseneñ Serbiäne yaqlağan Rusiä qarşılığı säbäple Berläşkän Millätlärdä çişelä almawı, bu eşneñ xäzer nigezdä Yewropa Berlege tarafınnan xäl itelä aluına işarä itä.

Dimäk, räislek itä başlağan Sloveniä bu eşlärneñ aldında toraçaq häm anıñ töp maqsatı - waqiğälärneñ mömkin bulğan bar tiskäre näticälären aldan uq kimetü, minimumğa töşerü.
XS
SM
MD
LG