Accessibility links

Кайнар хәбәр

Amerikan prezidentlığı yarışı başında alğa Obama belän Huckabee çığa


Iowada partiälärneñ berençel saylawı
Iowada partiälärneñ berençel saylawı

Şulay itep, dönyadağı iñ qüätle wazifa - amerikan prezidentı bulu öçen yarışka räsmi start birelde diärgä bula. Quşma Ştatlarnıñ İowa ştatında demokratlarnıñ da, respublikannarnıñ da berençel saylawı uzdı. Berençelärennän anda senator Barack Obama, ä ikençelärennän isä Mike Huckabee ciñep çıqtı. Ämma bu älegä zur ber köräşneñ başı ğına, noyäbrdäge tawış birü könenä qädär xällär tamırdan üzgärä ala.

Aq yortqa iltkän ozın häm sikältäle yulda şulay itep alğa çığuçılar da, häm üzenä kürä berençe adımda uq abınuçılar da bar. Ciñüçelärne çittän tıñlap torsañ, alar prezidentlıqnı inde bügennän ük yawlağan axrı digän xis qala.

"Bez şuşı kiçne kürgän närsä ul amerikan säyäsätendä yaña kön bulıp tora. Amerikanıñ säyäsi tormışı öçen yaña kön bar amerikan xökümätenä dä kiräk bulğan kebek zarur ber närsä. Häm şul kön bügen İowa ştatında başlandı, ämma ul xäzer başqa ştatlar aşa da ütep Aq yortqa qädär barıp citäçäk", dip belderde üzeneñ respublikan nämzätlär arasında ciñüe iğlan itelgännän soñ Huckabee.

Elek üze şulay uq nigezdä awıl xucalığına nigezlängän Arkansas ştatın citäklägän, soñraq isä baptist wäğäzçe bulğan Huckabee İowada şul elekke kapitalın çınnan da bik osta faydalandı häm üzen keşelärgä süzen yarıp äytä torğan, xalıqtan çıqqan ber zat itep kürsätte. Ğadi saylawçı anı beryaqtan üzenä tiñ keşe itep kürä, ikençe yaqtan Huckabee Arkansas gubernatorı täcribäse belän üzeneñ ildäge iñ yuğarı eşkä dä layıqlı häm äzerlekle buluın raslıy.

Anıñ töp köndäşlärennän berse, İowa yarışında ikençe kilgän Mitt Romney, - äytkändäy, anıñ da gubernator täcribäse bar, ul Massachusets ştatın citäklägän ide, - İowada şaqtıy ğına aqça sarıf itte, ämma respublikan tawışlarınıñ küpçelegen, 34 protsentın barıber Mike Huckabee cıydı.

Demokratlar yağında da näticälär şaqtıy qızıqlı. Anda ciñgän Barack Obama da üzenä iğtibarnı täwäkkällege, prezident yarışında ciñüenä ışanuı belän cälep itte.

Demokrat-senator häm presidentqa nämzät Barack Obama
"Bez biredä qurquğa qarağanda ömetne saylıybız. Bez bülenüne tügel, berläşüne saylıybız. Häm şunıñ aşa bar Amerikağa üzgäreşlär kilä digän köçle ber işarä cibäräbez", dip belderä demokratlar partiäseneñ nämzätläre arasınnan ciñgän Barack Obama.

Obama Quşma Ştatlarnıñ ikençe ber ştatınnan - İllinoisdan senator bulıp tora. Üzeneñ saylawaldı köräşen ul "ömet" häm "üzgäreş" digän şiğärlär belän alıp bara. Obamanıñ başqa nämzätlärdän töp ayırması alay da bu tügel, ä anıñ amerikan tarixında berençe märtäbä prezident yarışınıñ şuşı stadiäsenä qädär kilep citkän täwge afroamerikan buluında. Yäğni anıñ ata-babaları çığışı belän Afrikadan.

Älegä ul üzeneñ töp köndäşlären - 2004-nçe yılğı saylawda vitse-prezident nämzäte bularaq qatnaşqan John Edwardsnı häm ikençe ber mäşhür senator Hillary Clintonnı uza aldı. Ämma İowadağı uñış üzennän-üze başqa ştatlarda da qabatlana digänne añlatmıy.

Näq şundıy uq berençel saylaw nämzätlärne xäzer New Hampshir ştatında kötä, anısı kiläse sişämbedä uzaçaq. Mondıy üzenä kürä iläk aşa uzu här ştatta bula. Här partiädän prezidentlıqqa häm vitse-prezidentlıqqa töp nämzätlär isä alarnıñ qorıltaylarında iğlan itelä. Demokratlar anı august azağında Denverdä, respublikannar sintäbr başında Minneapolistä ütkärä. Prezident saylawı Quşma Ştatlarda noyäbrneñ 4-enä bilgelängän.

Xalıq arasındağı abruylarına qaramastan, İowada älegä alğa çıqqan Obamanıñ da, Huckabeeneñ dä ike caysız citeşsezlege bar - alarnıñ bersendä dä tışqı säyäsät täcribäse yuq diärlek.
XS
SM
MD
LG