Accessibility links

чәршәмбе, 7 декабрь 2016, Казан вакыты 15:24

Gruziädäge saylawnı küzätüçelär "xalıqara taläplärgä turı kilde" dip bäyäläde. Rusiä tışqı eşlär ministrlığı belderüendä "saylawaldı kampaniäse waqıtında xakimiät resursları qullanıldı, oppozisiägä basım yasaldı" dielgän.


Tärtip bozu häm citeşsezleklär terkälsä dä, alar tawış birü näticäsenä yoğıntı yasarlıq tügel ide, di xalıqara küzätüçelär. Ä menä Rusiä bu yulı oppozisiä yağına bastı.

Küzätüçelärneñ yuğarı räsmi wäkile, amerikan kongressı äğzase Alcee Hastings, Gruziädäge saylawnı - demokratiägä taba zur adım dip bäyälägän ide. Rusiäneñ tışqı eşlär ministrlığı bu belderüne dä "say" dip bäyäläde.

Gruziä parlamentınıñ xalıqara eşlär komitetı başlığı Konstantin Gabaşvili, Rusiäneñ belderüen täñqitläp çıqtı:

"Rusiä – saylawnı tanımağan berdän ber il. Tağın ber märtäbä, Rusiä, tawış birüne küzätkän 32 il yasağan säyäsi belderülärdän çitläşep izolyasiädä qaldı."

Mäskäwgä belemen Quşma Ştatlarda alıp qaytqan Mixail Saakaşvilineñ Gruziäne NATO häm könbatışqa taba tartuı oşamıy. Gruziägä qarşı iqtisadi çikläwlär dä kertelde, uzğan yıl Tiflistä Rusiä ofiserlarınıñ qulğa alınuınnan soñ Rusiädän meñlägän gruzin keşese quıldı.

Ämma bu yulı Rusiä Gruziä eşlärenä tıqşınmadı, dip söyläde oppozisiä wäkile Berdzenişvili:

"Allağa şöker, Rusiä bu saylawğa tıqşınmadı. Bu soñğı yıllarda Rusiä qılğan iñ aqıllı ğamäl buldı. Elegräk Saakaşvili oppozisiä wäkilläre – Mäskäw agentları digän bulsa da, ul da tuqtadı."

Belgeçlär dä Mäskäw Saakaşvili köndäşlärenä yardäm itmäde, dip belderä. Gruziä saylawın yaqtırtqan Rusiä jurnalistı Vadim Dubnov, çınbarlıqta Rusiäneñ täñqit süzläre saylawğa qağılmıy da, dip sanıy:

"Rusiä - bezne dönya demokratiägä öyrätä ikän, bez dä äyrätä alabız, dip sanıy. Belderü döres üze, çınnan da oppozisiägä basım yasaldı, xakimiät resursları qullanıldı häm saylaw demokratik standartlardan yıraq ide. Şulay da bu – Rusiädä uzğan parlament saylawı yäki bulaçaq prezident saylawı belän çağıştırırlıq ta tügel."

Bu tawış birüne waqıtınnan alda Mixail Saakaşvili üze uzdırırğa färman birde. Noyaber ayında xökümätkä qarşı uram cıyınnarı başlanğaç ul prezidentlıq möddäten tuqtatıp yaña saylaw bulaçağın iğlan itkän ide.

Oppozisiä yañadan Saakaşvilinıñ ciñüenä riza bulmıyça xalıqnı uramnarğa alıp çığu belän yanıy. Yäkşämbe könne Tiflisneñ üzäk mäydanına 5 meñläp keşe çıqqan ide.
XS
SM
MD
LG