Accessibility links

чәршәмбе, 7 декабрь 2016, Казан вакыты 13:42

Gruziä oppozitsiäse köräşen däwam itmäkçe


Levan Gaçeçiladze üzäk saylaw komissiäse binası aldında, 08.12.2007

Levan Gaçeçiladze üzäk saylaw komissiäse binası aldında, 08.12.2007

Gruzidä prezident saylaw tiräsendä kierenkelek däwam itä. Räsmi näticä belän qänäğät bulmağan oppozitsiä wäkilläre sişämbedä üzäk saylaw komissiäse binasına bärep kerep, komissiä räisen xärämläşüdä ğayepläde häm urınınnan kitüen taläp itte.


Prezidentlıqqa däğwa itkän Levan Gaçeçiladze oppozitsiäneñ başqa wäkilläre belän sişämbedä Gruziäneñ üzäk saylaw komissiäsenä bärep kerep, komissiä räise Levan Tarxnişviline xärämläşüdä ğayepläde häm urınınnan kitergä taläp itte.

Komissiäneñ älegä räsmi iğlan itelmägän näticäsenä kürä, şimbä könne ütkän waqıtınnan alda prezident saylawında xäzerge prezident Mixail Saakaşvili tawışlarnıñ 52% çamasın cıyğan. İkençe urında Levan Gaçeçiladze, anıñ -25% çaması.

Bu näticägä kürä, Saakaşvili berençe turda uq ciñä digän süz, ikençe tur kiräk bulmayaçaq.

Oppozitsiä bu näticä belän kileşmäwen, iğlan itelgän sannarnıñ çınbarlıq belän turı kilmäwen, här tawış öçen köräşäçägen belderä.
Levan Gaçeçiladze (s) Levan Tarxnishvili belän tartqalaşa, Tiflis, 08.12.2007

"Bez sezneñ belän sez gruzin xalqı belän söyläşkän teldä söyläşäçäkbez. Sez bu saylawda xärämläştegez, monıñ öçen bar gruzin xalqı alıdnda cawap totaçaqsız häm xökem iteläçäksez. Min sezgä süz biräm" dide oppozitsiä namzäte Levan Gaçeçiladze.

Gaçeçiladze üzäk saylaw komissiäse räise Tarxnişvilinı tawış birü protokolların kürsätergä taläp itte. Andağı näticälärne iğlan itelgän sannar belän çağıştıru öçen.

Tarxnişvilinı, oppozitsiäne, anıñ eş bülmäsendä bärep kerüdä häm basım yasawda ğayepläde.

Oppozitsiä sişämbedä Tiflistä qarşılıq çarası başlaw belän yanağan ide. Läkin soñğı minutta uram cıyının ütkärmäskä, anıñ urınına köräşne mäxkämädä alıp barırğa qarar itelde. Taläpläre ütälmäsä oppozitsiä açlıq iğlan itäçägen belderä.

Ul arada xalıqara küzätüçelär, tawış birü waqıtında ayırım tärtip bozular bulsa da, nigezdä, alar ğädel häm irekle ütte, dip belderä.

"Gruziä xalqın qotlarğa kiräk. Yewropada iminlek häm xezmättäşlek oyışması äytüençä, bu saylaw xalıqara taläplärgä nigezdä turı kilgän. Şul uq oyışma qayber problemnar buluın da açıqlağan. Bez Gruziä xökümäten alarnı tikşerergä çaqırabız. Läkin, ğomumän alğanda, oyışma fikerençä, bu saylaw Gruziä xalqınıñ telägen döres çağıldıra" dide Quşma Ştatlarnıñ däwlät departramentı wäkile Sean McCormack.

Qotlawnı şuly uq Yewropa Berlege dä ireşterde häm Gruziäneñ bar säyäsi köçlären saylaw näticälären ixtiram itergä häm ilneñ kiläçäge öçen bergäläp eşlärgä öndäde.
XS
SM
MD
LG