Accessibility links

Кайнар хәбәр

Bush İzrail, Fälestin räsmiläre belän oçraştı


Ramallada G.Bush M.Ğabbas belän oçraştı
Ramallada G.Bush M.Ğabbas belän oçraştı

AQŞ prezidentınıñ Yaqın Könçığışqa säfäre däwam itä. Bush Yaqın Könçığışta solıx urnaşaçağına ışana, İzrail häm Fälestin yulbaşçıları moña äzer, dip sanıy.


Bügen amerikan prezidentınıñ töbäkkä säfäreneñ ikençe köne ide. Ramallada ul fälestin xakimiäte prezidentı Mäxmüd Ğabbas belän oçraşqannan soñ, ike citäkçe jurnalistlar aldına çıqtı. Yaqın kiläçäktä İzrail belän kürşedä fälestin däwläte tözeläçägenä Bush şiklänmi:

"Tieşle yardäm belän fälestin däwläteneñ tözeläçägenä min ışanam. Däwlät tözelü - tınıçlıq buldırunıñ möhim adımı bulaçaq."

Fälestin däwläte – fälestin xalqı häm İzrailgä genä tügel, böten dönyağa kiräk, dip östäde amerikan prezidentı. Ämma moña ireşü äle bik yıraq, ike yaqnıñ da eşlise eşläre küp.

Fälestin cire yähüd awılları, tözeleşläre belän bülenmäskä, ber böten bulırğa tieş, dide Bush. Fälestinnär terror höcümnären tuqtatırğa tieş.

İzrail cirlärenä Ğäzzädän raketalar atunı tuqtatuğa ireşü – Ğabbas xökümäte öçen zur sınaw bulıp tora. Ğäzzä xäzer Hämäs kontrolendä.Ğabbasnıñ Fatah xäräkäte wäkillärennän torğan xökümäte belän suğışçan Hämäs törkeme arasında nizaq qayçan çişeler – moña Bush cawap birä almıy.

İke arada kirtä bulıp torğan tağın ber möhim mäsälä bar – Yerusalim şähäre. Yähüdlär dä, fälestinnär dä anı üz başqalası itep kürä.

Çärşämbe könne Bush İzrail citäkçelege belän oçraştı. Premyer-ministr Ehüd Olmert, İzrail fälestinnär belän kileşügä ireşergä teli, dide:

"İzrail yağı bu söyläşülärgä bik citdi qarıy häm kileşügä ireşü öçen kiräk bulğannı barısın da eşlärgä äzer."

Dönya matbuğatında İzraildä bulğan oçraşular bügen töp temalarnıñ berse. Newsweek basması, Bushnıñ Yaqın Könçığış säfäreneñ uñışlı buluına şik belderä. Bill Clinton da, Bushnıñ ätise Geroge Bush ta prezidentlıqlarınıñ soñğı yıllarında yaña söyläşülär başlap qarağan ide, dip yaza Newsweek xäbärçese. Häm säfärneñ tağın ber zur maqsatın iskä töşerä. İzrail, fälestin cirlärennän soñ Bush ğaräp illärenä kitäçäk. Anda ul däwlät başlıqlarınnan İranğa basımnı arttırunı sorayaçaq.

NYT basması – Olmert belän Bush arasındağı yaqın mönäsäbätlär turında yaza. Häm ul mönäsäbätlärneñ här çaq andıy yaqın bulmawı, xäzer genä alarnıñ ber bersenä teläktäşlek kürsätüläre turında yaza. Alar ikese dä sport, sälämät yäşäw räweşe, siräk kenä sigara tartıp quyarğa yarata, dip başlıy mäqäläsen NYT jurnalistı.

Şimbä könne AQŞ prezidentı Quwäit häm Bahrainğa baraçaq. Şunnan ul säfären Söğüd Ğaräpstanı, Mısırğa däwam itäçäk.
XS
SM
MD
LG