Accessibility links

якшәмбе, 4 декабрь 2016, Казан вакыты 06:58

Hindstannıñ iñ zur avtomobil şirkäte Tata, bügen dönyanıñ iñ arzan “xalıq maşinasın” täqdim itte. Maşina bazarına qıyu kergän Tata şirkäte, 2.500 dollar qimmätendäge maşinalarnıñ motosikllarğa köndäş bulaçağın däğwä itä.

Yewropada, maşina bazarı yaña canlana başlağanda berençelärdän bulıp Germaniä Volkwagennı – yäğni “xalıq maşinasın” iğlan itte. Maqsat ğadi xalıq ta anı satıp ala alsın. Läkin bu xalıq maşinası äle dä ğomum xalıqnıñ maşinası tügel, bälki bay xalıqnıñ maşinası bulıp tora. Könbatış belän könçığış maşinaları arasında äle dä qıyu yarış barğanda, Hindstan üz xalıq maşinasın iğlan itte. 100.000 rupia yäğni 2.500 dollar qimmätendäge bu maşina, dönyanıñ iñ arzan maşinası dip sanala. Bügen Hindstannıñ Tata şirkäte, “Nano” isemle bu maşinasın Dählidä maşina yärminkäsendä tanıttı.

Tata şirkäte başlığı Ratan Tata bu maşinanı il öçen yaña ber açılış bularaq bäyäläde.

“Monda kilgänegez öçen räxmät, Min bu maşinanıñ yaña ber açılış bulaçağın ömit itäm”

4 tägärmäç häm 4 urınlı bu maşina, 600 kübiksentimetr motorğa bar. Bu sıyfatta bulğan ber maşina küp xalıqnı üzenä cälep itär dip ömetlänelä. Ber milliardtan artıq xalqı bulğan ildä, xatını balası belän ber motosiklğa töyälgän keşelärneñ yulda cilderüen kürü bik ğadäte äyber. Yullarda motosikllarnıñ küp buluı tığımnar häm qazalarnı da bäräbärendä kiterä. Citmäsä hawanı da küpkä pıçrata. Tata şirkäte wäkilläre yullardağı bu küreneşne tağın da imin buldırunı üz şirkätläre öçen maqsat quyuların belderä.

Hindstanda soñgı arada maşina satışı da küpkä arttı. Şulay da Hindstanda meñ keşedän ni barı 7senä genä ber maşina turı kilä.

Xäzergä benzin belän eşlägän maşina 20 çaqrım yıraqlıqqa, ni barı ber litr benzin sarıf itä, Şirkät wäkilläre yaqın arada bu maşinanıñ dizel modelların çığaraçağın belderä.

Läkin älbättä Tata, Hindstan bazarına ğına qaramıy. Şirkät, maşinalarnıñ Azia, afrika häm Yaqın könçığışqa da satırğa cıyına.

Läkin mondıy arzan bäyäli maşinanıñ ışanıçı ni däräcä bulır digän şik-şöphälär dä bar. Britaniädäge maşina sänäğate kinäşçese Mark Bursa bu maşina turında bolay dide:

“Bez bu maşinalarnı alğa taba ozın waqıtqa yullarda kürergä ömet itäbez. Bik tıynaq qına kürelä, keşelär anı törle äybergä oxşata, şäp ber golfçe maşinasınnañ alıp, köylängän traktor-eşe maşinağa qadär”

Läkin çıñ barlıqta başqa maşinadan ällä ni kim bulmağan, zamança küreneştäge bu maşina, dönyadağı iñ arzan maşina bäyäseneñ yartı bäyäsenä satıla. Bu isä dönya maşina sänäğatenä zur täser yasıyaçaq dip farazlana. Qaysı ber küzätüçelär, maşina bäyälären töşerüdä ber inqilap bulır dip uylıy. Yäisä yaqın bäyädä başqa modellär dönya kürer diyelä.

Hindstan Qıtay buldıralmağannı buldırdı, arzanraq bäyägä maşina çığaruğa ireşte. Älbättä bu yaña köndäşlekkä Qıtay da kiçekmäsdän cäwap birer diyelä. Läkin şulay da bu adım Tatağa älegä kiläçäk wäğdä itä. Tata şirkäte arzan maşinaları ğına tügel sıyfatlı maşinaları da bar. Monnañ qala Tata, Britaniäneñ Ford şirkäteneñ lüks maşina modelläre Jaguar häm Range Rovernı da satıp alu öçen 2 milliard dollar taqdim itkän.

XS
SM
MD
LG