Accessibility links

якшәмбе, 11 декабрь 2016, Казан вакыты 07:22

Amerikan prezidentı George Bush Yaqın könçığış säfären däwam itep bügen Ğäräp Ämirleklärenä kilde. Äbü Dabida Strategik tikşerenülär üzägendä yasağan çığışında ul İran citäkçelärenä kisken tänqit belderde.


"Bügen İran terrorçılıqnıñ baş sponsorı bulıp tora. Bar dönya buylap ekstrmistlarğa ul yözlägän million dollar cibärä. Gärçä üz xalqı basım astında, moxtaclıqta integä", dide amerikan prezidentı.

Bush süzlärençä, İran Äfğanstandağı taliplarğa, Ğiraqtağı şiğilarğa, Livandağı suğışçılarğa qoral cibärep, bu töbäktä solıx urnaştıru tırışlığına ayaq çala.

Berük waqıtta ul İran xalqın "bay mädäniätle, sälätle xalıq" dip atadı. Bu xalıq anıñ süzenä qolaq salğan xökümätkä layıqlı dide ul.

"Kiler ber kön, İran xalqınıñ ireklek häm ğädellekne ixtiram itkän xökümäte bulaçaq. Bu kön kilgäç, İrannıñ Quşma Ştatlardan da yaxşıraq dustı bulmayaçaq" dide George Bush.

Bush Amerikanıñ Yaqın könçığışta demokratiä urnaştıru niäte "köçle häm däwamlı" dide häm anı zamanında Aziä illärenä, şul isäptän, Yaponiägä kürsätelgän yärdäm belän çağıştırdı.

Farsı qultığınıñ qayber illärendä başqarılğan demokratik üzgäreşlärgä Bush xuplaw beldere, häm töbäkneñ başqa illären dä şuşı yuldan barırğa öndäde:

"Täcribädän belübezçä, demokratiä – şäxesneñ abruyın häm xoquqların iskä alğan, tınıçlıq häm totrıqlılıq täemin itä alğan berdän-ber idarä räweşe" dide amerikan prezidentı.

Ber atnalıq säfär barışında Bush İzrail, Fälästin cirlärendä, Küwäyt, Baxreyn häm Ğäräp Ämirleklärendä buldı. Anıñ tağın Söğüd Ğäräpstanı häm Mısırğa baruı qaralğan.
XS
SM
MD
LG