Accessibility links

җомга, 2 декабрь 2016, Казан вакыты 22:54

İran Baradey belän kileşügä ireşkän. AQŞ monıñ ähämiäte yuq, di


Möxämmät Äl-Baradei (s) häm İran wäkile Ali Äsqär Soltaniä Tähran hawa alanında, 11.01.2008

Möxämmät Äl-Baradei (s) häm İran wäkile Ali Äsqär Soltaniä Tähran hawa alanında, 11.01.2008

İran häm Xalıqara atom energiä idaräse Tährannıñ atom programına bäyle bar çeterekle mäsälälärne 4 atna eçendä xäl itep beterergä kileşkän. Bu turıda idarä başlığı Möxämmät Äl-Baradey atna axırında Tähranda söyläşülär ütkärgännän soñ xäbär itte. Ämmä räsmi Waşington, bu kileşü, uran bayıtunı tuqtatu kebek töp mäsälägä qağılmıy, dip belderde.


Uzğan yäkşämbe Tähranda ireşelgän kileşü çınlap ta, İrannıñ atom programı tiräsendäge nizaqnı xäl itä almıy, çönki anda, İranğa Berläşkän Millätlär tarafınnan quyılğan töp taläp – uran bayıtunı tuqtatu taläbe - telgä dä alınmağan.

Şulay da, bu kileşü İrannıñ ozaq yıllar buyına idän astında nindi eşçänlek alıp barğanına küpmeder açıqlıq kertä. Atap äytkändä, anda ike mäsälä telgä alına.

Berse xärbi tarmaqqa qarağan tikşerenülärgä bäyle. Äytik, İran, UF4 isemle matdä yasarğa tırışqan, digän işarälär bar. Uran ftoridı dip atalğan bu matdä çista uran citeşterüdä çimal bularaq bilgele. Şulay uq, raketa texnologiäsenä qarağan tikşerenülär dä bar.

İkençe mäsälä – İrannıñ texnik universitetında tabılğan nurlanış qaldıqları. Xalıqara atom idaräse bu nurlanışnıñ monda qaydan kilgänen belergä, universitetta eşlägän keşelär, cixazlar belän tanışırğa teli.

Bu mäsälälär idarä şurası planına uzğan yılnıñ noyäberendä ük kertelgän ide häm älegäçä cawapsız qala ide.

Amerikan prezidentı George Bush belän Yaqın könçığış säfärendä yörgän Aq yort süzçese Gordon Johndroe, bu kileşüne İrannıñ elekke eşçänlegenä yaqtılıq kertkän uñay adım dip atadı.

Berük waqıtta, monıñ uran bayıtunı tuqtatu kebek top mäsälägä ber qatışı da yuq, dide ul.

Amerikan prezidentı George Bush Yaqın könçığış säfärenä çığar aldınnan, Quşma Ştatlar İranğa uran baytu qimmätkä töşsen öçen tırışaçaq, digän ide.

"İqtisadi basım, finans çikläwlär İran xalqın – uran baytunı däwam itergä kiräkme, yuqmı – bu turıda uylanırğa mäcbür itäçäk" dide amerikan prezidentı.

Yaqın könçığış illärenä säfäre waqıtında George Bush bu illärneñ citäkçelären İrannan yanağan qurqınıç turında kisätte. Yäkşämbedä Äbü Dabida yasağan çığışında ul İrannı dönyadağı terrorçılıqnıñ baş ximayaçısı dip atadı.

XS
SM
MD
LG