Accessibility links

шимбә, 3 декабрь 2016, Казан вакыты 18:52

Татарстан премьеры Төркмәнстан җирендә


Рөстәм Миңнеханов илнең яңа җитәкчесе белән дә очраша

Рөстәм Миңнеханов илнең яңа җитәкчесе белән дә очраша

Татарстан хөкүмәте башлыгы Рөстәм Миңнеханов Төркмәнстан сәфәре барышында Төрекмәнбашы мәчетен карап, ул язган “Рухнамә” китабының татарчасын да тәкъдим итәчәк.

Бу көннәрдә Татарстан хөкүмәте башлыгы Рөстәм Миңнеханов Төркмәнстан белән Татарстан арасында икътисадый-мәдәни мөнәсәбәтләрне ныгытып йөри.
Әлеге делегация 14 гыйнварда Ашгабаттан ерак түгел Кыпчак авылының дини-мемориал комплексында булды. Аннан Төркмәнстанның беренче президенты Сәпәрморат Ниязовның төрбәсендә символик стелага чәчәкләр салды.

“Миңа (Татарстан вәкиллегендә булган мәдәният министры) Зилә Вәлиева Төркмәнстаннан шалтыратты, бик яхшы каршы алдылар дип әйтте. Шулай булырга тиеш, чөнки без тугандаш халык,” - ди 15 ел Төркмәнстанда яшәп алган тарихчы Алберт Борханов. Ул Татарстан белән Төркмәнстан арасын якыйнайткан шәхес. Бүгенге көндә бу ике республика белән мөнәсәбәтләр яхшыра, ди ул.

Татарстан вәкилләре шулай ук Төркмәнстанның беренче президенты язган “Рухнамә” китабының татарчасын тәкъдир итү кичәсендә дә катнашачак. “Рухнамә” китабының татар теленә тәрҗемә итү эшләрен “КАМАЗ” үз өстенә алган. Әлеге оешманың мәгълүмат сәясәте департаментының баш белгече Фәһим Җиһаншин сөйли:

“Ил президенты Корбангулы Бирдемөхәммәдовның Татарстан премьеры белән бергә “КАМАЗ” генераль директорын да кабул итүе табигый хәл. Беренчедән, Төркмәнстан белән икътисадый мөнәсәбәтләрне яңарту эшен моннан берничә ел нәкъ менә “КАМАЗ” башлап җибәргән иде. Соңрак башка тармак предприятиеләре дә килеп кушылдылар. 2005 елның февралендә Төркмәнстан президенты Сәфәрморат Ниязов Сергей Когогинны кабул итте. Ул вакытта Төркмәнбашы “КАМАЗ” җитәкчесенә ике зур үтенеч белдергән иде. Бүген “КАМАЗ” аларны үтәде дисәң дә була.

Беренче үтенеч, табигый ки, КАМАЗ машиналарын Төркмәнстанга җитештереп тапшыруга кагылышлы. Төркмәнбашының хыялы тормышка ашты: хәзер Төркмәнстан “КАМАЗ” өчен иң әһәмиятле булган өч илнең берсе: Казакъстан һәм Украина белән бергә.

Бүген тәкъдим ителгән татарча “Рухнамә” дә “КАМАЗ” белән бәйле. Төркмәнбашының икенче үтенечен тормышка ашыру булды бу. “КАМАЗ” бу китапны тәрҗемә һәм нәшер итү эшләрен финанслады. Ә тәрҗемәне Казан белгечләре башкарды.

Бу китапны миңа да укып чыгарга насыйп булды. Бик тә күңелгә ятышлы, кешеләрне рухландыручы, аларда милли горурлык хисе уятучы китап бу. Аның һәр җөмләсеннән, һәр сүзеннән күренеп тора: бу әсәрне үз халкына җаны-тәне белән бирелгән, аңа мәңге турылыклы кеше язган. Тугандаш Төркмәнстан, минемчә, озакламый бик бәхетле кешеләр дәүләте булып китәчәк.”

Хәзер “Рухнамә” 30га якын телгә тәрҗемә ителгән.

XS
SM
MD
LG