Accessibility links

чәршәмбе, 7 декабрь 2016, Казан вакыты 21:27

Rice Ğiraqqa kilde. Tatulıq urnaştıru niäte belän


Condoleeza Rice (s) häm Xöşiär Zebari Baghdadta ütkän matbuğat oçraşuınnan soñ, 15.01.2008

Condoleeza Rice (s) häm Xöşiär Zebari Baghdadta ütkän matbuğat oçraşuınnan soñ, 15.01.2008

Amerikan prezidentı George Bush belän Yaqın könçığış illärendä yörgän däwlät sekretare Condoleezza Rice sişämbedä aldan iğlan itelmägän säfär belän Bağdadqa kilde. Ğiraq räsmiläre belän oçraşıp ul ildä tatulıq urnaştıru tırışlıqların tağı da köçäytergä çaqırdı.


Rice xanım Bağdadqa Buşnıñ soñğı tuqtalışı - Söğüd Ğäräpstanınnan kilde. Kilü belän ul Ğiraq premier-ministrı Nuri Äl-Mäliki häm tışqı eşlär ministrı Xöşiär Zebari belän söyläşülär ütkärde. Soñnan ütkän matbuğat oşraşuında kürgän-işetkäne belän qänäğät qaluın äytte.

"Soñğı tapqır monda bulğannan soñ ber ay waqıt ütkän, min säyäsi täräqqiätneñ däwam itüen kürdem. Xäzer moña xalıq üze qatnaşa. Ekstremist, terrorçı, çit il suğışçılarına qarşı kütärelgän keşelärne kürep bula" dide däwlät sekretare.

Aq yort süzçese Gordon Johndroe Rice säfäreneñ maqsatın, ildä solıx urnaştıru tırışlıqlarına teläktäşlek belderü, Ğiraq parlamentın tieşle qanunnar qabul itergä öndäw, dip añlattı.

Xäzer Ğiraqta çağıştrımaça totrıqlılıq urnaştı dip sanala. Ämmä Waşington bu tınılıq waqıtlı bulırğa mömkin di häm şuşı forsatnı ildäge törle milli häm dini törkemnär arasında tatulıq urnaştıru öçen qullanıp qalırğa aşığa.

Süz xakimiätkä xäzer menep utırğan şiğilär, Säddam çorında xakimiättä bulğan sönnilär häm kördlär arasında tatulıq urnaştıru turında bara.

Bu taraftan qayber ğämällär başqarıla da. Şimbä könne Ğiraq parlamentı Säddamnıñ Baath partiäse äğzalarına xökümät eşlärenä qaytırğa röxsät itkän qanun qabul itte.

Xäzer Waşington tağın berniçä qanunnı alğa sörä, şul isäptän, cirle saylawlar häm Ğiraqnıñ neft häm gaz yatmaların ildäge törle milli häm dini törkemnär arasında büleşü turında.

Jurnalistlar belän oçraşu waqıtında Rice xanım Ğiraq häm Quşma Ştatlar ozaq waqıtqa partnerlar bulıp qalaçaq, dide.

"Ğiraqnıñ demokratik räweştä saylanğan xökümäte häm Quşma Ştatlar ike il arasında ozın möddätle mönäsäbätlär bulırğa tieş dip kileşte. Bezneñ ozın möddätle urtaq mänfäğätlär bar. Şularnıñ iñ möxime – üzen üze saqlarlıq berdäm Ğiraq buldıru" dide däwlät sekretare.

Condoleezza Rice bügen ük kire Söğüd Ğäräpstanına kitä häm Buş belän bergä Yaqın könçığış säfären däwam itep Misırğa yul totaçaq.

XS
SM
MD
LG