Accessibility links

шимбә, 10 декабрь 2016, Казан вакыты 21:44

Räsmi Mäskäw küptän tügel Gruziädä ütkän prezident saylawında “idarä basımı qullanıldı, oppozitsiä namzätläre ezärleklände, alarnıñ finans häm media mömkinlekläre çiklänelde” digän tänqit beldergän ide. Näq şul ısullar bügen Rusiäneñ üzendä Medvedevnı yaña prezident itü öçen qullanıla.


Asılda Kremlneñ eşe inde betkän diärgä bula. Levada üzäge ütkärgän fiker beleşügä qarağanda, saylawçılarnıñ yartısınnan kübräge, ä qarar qılğannarnıñ xättä 70%-tı, berençe vitse-premier Dmitriy Medvedevnı inde bügen ük prezident itergä äzer. Vladimir Putin üze 13% çaması belän ikençe urında, gärçä saylanırğa xoquqı bulmasa da. Kommunistlar citäkçese Gennadiy Zyuganov häm LDPR başlığı Vladimir Jirinovskiy 5-7%, elekke premier Mixail Kasyanov, küp digändä, 1% cıya.

Dmitriy Medvedev (s) häm Vladislav Surkov: prezident yasaw ul matreşka yasaw ğına tügel

Şuña da qaramastan, prezident idaräse başlığı urınbasarı Vladislav Surkov Medvedevnı yaña patşa itü kampaniäsen çın-çınlap alıp bara. 60-tan artıq töbäk citäkçese Duma saylawında Berdäm Rusiäneñ cirle isemlegen citäklärgä rizalaşqan ide. Xäzer alar prezident kapmaniäse belän mäşğül.

Medvedev kön sayın televidenie ekranında, Rusiäneñ äle ber äle ikençe töbägendä. Saylawçılar tügel, cirle türälär belän oçraşa. Tegeläre Medvedevnıñ milli proyektları qısalarında başqarğan eşlären kürsätä. Bik tırışıp kürsätälär. Tağın 4 aydan Medvedev alarnıñ här qaysısın, qanun nigezendä, urınınnan ala alaçaq. Saylawçılardan sorap tormıyça. Xakimiät bağanası yuqqa ğına torğızılmadı.

Bu bağana qaywaqıt çama digän närsäne ğomümän onıta. Äytik, dekabr saylawında İnguşetiä türäläre xalıqnıñ 98.35%-tı qatnaştı, şularnıñ 98.72%-tı Berdäm Rusiägä tawış birde, digän xisap yasadı. Bu keşe ışanmaslıq sannarğa dälil tabu öçen, cirle aktivistlar saylawğa barmadım dip ant itä alğan keşelärne sanarğa totındı. Uzğan atnada alar şundıy 87 meñ keşe tabılğanın xäbär itte. Bu bar saylawçılarnıñ 54%-tı digän süz. Dimäk, saylawda xalıqnıñ 98%-tı qatnaştı digän süz yalğan bulıp çığa. Cirle prokuratura bu mäsäläne tikşermäsä, aktivistlar Yewropa mäxkämäsenä barırğa cıyına.

Çärşämbedä prezidentlıqqa üzlegennän däğwa itüçe ike namzät – Kasyanov häm Demokratik partiä citäkçese Andrey Bogdanov terkälü öçen cıyğan 2 million imzaların saylaw komissiäsenä tapşırdı. Xäzer komissiä bu imzalarnıñ döreslegen tikşeräçäk. Üzeneñ qararın ul 26 ğinwarda äytergä tieş.

Küp kenä belgeçlär fikerençä, kimendä Kasyanov namzät itep teräklmäyäçäk. Axırda namzätlär isemlegendä Medvedev, Zyuganov, Jirinovskiy häm, küz buyaw öçen, Bogdanov qalaçaq.

Räsmi kampaniä 2 fevraldä başlana, saylaw – 2 martta ütäçäk. Läkin Medvedev bu syalawnı inde ciñde. 10 dekabr könne, Putin anı waris dip iğlan itkännän soñ.
XS
SM
MD
LG