Accessibility links

сишәмбе, 6 декабрь 2016, Казан вакыты 23:05

Serbiädä saylaw: mäğripkäme, mäşriqqamı?


Saylaw aldı şiğärendä Tomislav Nikoliç (s) häm Boris Tadiç

Saylaw aldı şiğärendä Tomislav Nikoliç (s) häm Boris Tadiç

Yäşkşämbedä Serbiädä ütäçäk prezident saylawı ilneñ nindi yuldan kitäçägen bilgelär dip kötelä. Xäzerge prezident Boris Tadiç Könbatış tatarflı, anıñ töp köndäşe, Radikal partiä citäkçese Tomislav Nikoliç, Mäskäwgä yöz tota. Saylaw yarışın qızdırıp torğan töp mäsälä – Kosovo.


Serbiä prezidentı urınına 9 namzät däğwa itä. Läkin töp köräş alarnıñ ikese arasında baraçaq. Ayrıma cir belän kük arası diärlek.

Xäzerge prezident Boris Tadiç - Slobadan Miloşeviç bärep töşerelgännän soñ, Serbiäne mäğripkä qaratqan häm 2003 yılda üterelgän Könbatış taraflı premier Zoran Djindjiçnıñ warisı sanala.

Fiker beleşülärgä qarağanda, serblarnıñ 70%-tı Yewropa Belegenä kerü yağında. Tadiç radiobızğa birgän äñgämäsendä, saylawçılar şuşı yuldan taypılmas, digän ömet belderde:

President Boris Tadiç Könbatışqa yöz tota. Saylaw aldınnan soñğı çığış, Belgrad, 17.12.2008
"İmanım kamil, bu saylaw kampaniäse Serbiädäge säyäsi täräqqiätne üzgärtä almayaçaq. Başqa süzlär belän äytkändä, Serbiä Yewropa yulınnan taypılmayaçaq, çönki, bezneñ başqa yulıbız yuq" dide Serbiä prezidentı.

Tadiçnıñ töp köndäşe Radikal partiä citäkçese Tomislav Nikoliç, Rusiä belän tığızraq mönäsäbätlär urnaştıru tarafdarı, ciñgän oçraqta Mäskäwgä Serbiädä xärbu nığıtmalar urnaştırırğa täqdim itäçägen belderä. Şulay uq, Radikal partiägä nigez saluçı, xäzer suğış cinäytlärendä ğayeplänep Haag mäxkämäse aldına basqan Voytslav Şeşelnı üzeneñ premier-ministrı itergä wäğdä itä. Serbiäneñ Yewropa Berlegenä taba awışuın Nikoliç ta tanıy. Min dä anda kerü yağında, läkin, Kosovo xisabına tügel, di ul:

Oppozitsiä namzäte Tomislav Nikoliç Serbiädä urıs ğäskärlären urnaştırmaqçı
"Keşelärdän sez Yewropa Berlegenä kerergä telisezme, dip sorıylar. Läkin monıñ öçen Kosovonı birergä kiräk bulaçağın, añlatmıylar. Xalıqqa döresen äytergä kiräk" di oppozitsiä namzäte.

Kosovo mäsäläse saylaw yarışınıñ üzägendä tordı. Liberal demokrat Sedomir Yovanoviçtan qala, 9 namzätneñ barısı da Kosovonıñ bäysezlegenä qarşı çığa.

Balkannan çittä Kosovonıñ kiläçäge inde xäl itelgän sanalsa, serb räsmiläre ser birmäskä tırışa. Berkemneñ dä tarixqa "Kosovonı yuğaltuçı" bulıp kerep qalası kilmi. Belgrad uramındağı qayber keşelär dä bu mäsäläne yöräklärenä yaqın qabul itä.

"Bu bik çeterekle, tarixi, mädäni, dini mäsälä. Kosovoğa närsä bäyläp torğanın añlata da almıym. Kosovo serblarnıñ qanında, monı üzgärtü bik qıyın."

"Kosovonıñ ayırıluı minem öçen problem tügel. Kosovoğa qarata şundıy xislär kiçergän keşelärne añlamıym. Min andıy keşe tügel."

Kosovo mäsäläse saylaw aldı yarışında zur urın alıp torsa da, älbättä, serblarnı borçığan başqa mäsälälär dä bar. Xalıqnıñ zur öleşe moxtaclıqta yäşi. Bu keşelär tawışların quş tırnaqlar eçendä, qorasağı belän biräçäk.

Berençe turda ber namzätä tä tawışlarnıñ 50%-tın cıya almas kebek. Bu oçraqta 3 fevraldä ikençe tur ütäçäk.

XS
SM
MD
LG