Accessibility links

шимбә, 3 декабрь 2016, Казан вакыты 22:52

“Төртә, төртә аңлаттылар да, бер ризык урнына ялгыш икене алып килгән идем. Кире алып китмәкче итем, аннан, ярар миннән бүләк булыр дип, калдырдым. Үзем түләдем аннары шуның өчен”,- дип сөйли “Татар ашлары йорты” табынчысы Ландыш Гәрәева.


Иңглиз теле белмәү табынчының кесәсенә дә сугарга мөмкин. Ландыш Гәрәева әйтүенчә, “Татар ашлары йорты” ресторанында эшләүче 12 табынчының берсе дә иркен итеп чит телдә сөйләшә белми. Чит ил кешеләре кергәндә аларны иңглиз телендәге меню коткара. Иң югында, “кайберләрен, мәсьәлән, итне ничек, чәйне ничек сорарга икәнен беләбез, ә ачыктан-ачык сөйләшү авыр бирелә”,-ди ул.
Бу ресторан Казандагы иң кыйммәтле туклану урынарының берсе. Казанга килгән чит ил туристлары монда кергәләп тора һәм аларга бигрәк тә милли ризыклар: өчпочмак, вак бәлеш, пәрәмәч ошый икән.
“Солтан кебаб” рестораны да Казанның Бауман урамына урнашкан. Аны казанлылар “Анталия” кафесы буларак белә. Хәләл иттән әзерләнгән ризыкларны үз итүчеләр дә еш була монда. Табынчы Олеся бу аш йорты ачылганнан бирле 4 ел инде биредә эшли.
“Гадәттә бездә җәй көннәрендә чит ил кешеләре була. Немецлар, иңглизләр керә. Элек безнең үзебезнең тәрҗемәчебез бар иде. Ул яхшырак эш тапты да бездән китте”,-ди Алеся. Бер сүз дә урысча белмәгән чит ил кешесенә монда рәсемле меню тәкъдим ителә. Ул коткара.
Казан үзәгендәге тагын бер ресторан “Татарстан” кунакханәсендә дә яхшы итеп иңглиз телендә сөйләшкән табынчы юк икән. Администратор Фаида Емельянова әйтүенчә, хәзер табынчылар күбесе яшьләр. Һәм алар мәктәп программасында өйрәнгәннән “чәйлек-тозлык” булса да сукалый. Шулай итеп, әлегә кадәр Казандагы туклану урыннарында иңглиз телен яхшы белү таләбе куелмаган иде. Бу атнада Казан шәһәренең кулланучылар һәм хезмәт күрсәтү базары комитеты хезмәткәрләре рестораннарда эшләүчеләрнең никадәр иңглиз телен белүен тикшерүгә чыкты. Һәм бу тикшерүдән соң нәтиҗәләр ясалачак һәм аерым бер таләпләр дә катыланыр кебек.

XS
SM
MD
LG