Accessibility links

дүшәмбе, 5 декабрь 2016, Казан вакыты 21:51

Mixail Kasyanov tarafdarların 2 mart saylawında qatnaşmasqa çaqıra


Üzäk saylaw komissiäse Mixail Kasyanovnı prezidentlıqqa namzät itep terkämäde

Üzäk saylaw komissiäse Mixail Kasyanovnı prezidentlıqqa namzät itep terkämäde

Kasyanovnıñ saylaw aldı qağäzlärendä häm cıyılğan imzalarda kirägennän artıq xata häm citeşsezleklär bulğan, dip Rusiäneñ üzäk saylaw komissiäse oppozisiä namzäten terkämäde.


Bügen komissiä qararın äğza Elvira Yermakova iğlan itte:

"Kasyanov öçen cıyılğan imzalarnıñ 80 meñ 261re – yaraqsız, bu tulayım sannıñ 13.38% täşkil itä."

Qanunğa qarağanda, namzät itep terkäler öçen kimendä 2 million imza cıyılırğa tieş, alar arasında yaraqsız imzalar 5%tan artmasqa tieş.

Bu xaqta belgäç bügen Kasyanov üz tarafdarların 2 mart saylawına barmasqa çaqırdı. Anıñ yalğan imzalar cıyuın prokuratura tikşerä başladı.

Mixail Kasyanov 2000 alıp 2004kä qadär Putin xakimiäte astında premyer-ministr buldı. Wazifadan kitkäç ul Kreml täñqitşesenä äylände. Anıñ mart saylawında ciñü ixtimalı bik keçkenä ide, fiker beleşülärgä qarağanda Kasyanovnı xalıqnıñ 1%tı yaqlarğa mömkin ide.

Prezident saylawında Putin saylağan namzät, berençe vise-premyer häm Gazprom başlığı Dmitriy Medvedev ciñer dip farazlana.
Terkälgän qalğan 3 namzät –kommunistlar başlığı Gennadiy Zyuganov, liberal-demokratlardan Vladimir Jirinovsky häm Demokratik partiä başlığı Andrey Bogdanov. Alarnıñ berse dä Medvedevqa citdi köndäş dip sanalmıy. Zyuganov belän Jirinovskynı xalıqnıñ 10% çaması yaqlıy, Bogdanov 1%tan artıq tawış cıymas dip farazlana.

Şimbä könne Zyuganov firqa qorıltayı waqıtında Kremlne ğadel saylawğa çaqırdı häm däwlät televideniäsendä böten waqıt Medvedevqa birelä, dip belderde:

"Bez Medvedevnı açıq söyläşügä çaqırdıq, çönki problemalarnı urtağa salıp söyläşmiçäç döres häm ğadel saylaw ütkärep bulmıy. Şulay uq bez watandaşlarıbıznıñ ğadel saylawğa xoquqın yaqlap häm saylaw bülletennäreneñ urlanuına qarşı uram cıyınnarı oyıştıraçaqbız. "

Elekke dönya şaxmat çempionı Garry Kasparov saylawda liberal oppozisiädän namzät bulıp qatnaşmaqçı ide, ämma anıñ tarafdarlarına saylaw aldı utırışları ütkärergä urın birelmäde. Oppozisiäneñ tağın ber wäkile Boris Nemtsov, 2007neñ dekaberendä tawış birüdä qatnaşudan baş tarttı.

Üzäk saylaw komissiäse mäğlümatlärenä qarağanda, Yevropada İminlek häm Xezmättäşlek Oyışması küzätüçelärenä çaqırular düşämbe könne äzer bulaçaq. Oyışma dikaberdä uzğan Duma saylawına üz keşelären cibärmägän ide.
XS
SM
MD
LG