Accessibility links

җомга, 9 декабрь 2016, Казан вакыты 08:46

Prezident Bush soñğı yıllıq yullamasın yasıy. Ni äyter?


Bıltırğı yullama waqıtında iqtisad äle yaxşı xäldä ide

Bıltırğı yullama waqıtında iqtisad äle yaxşı xäldä ide

Qazanda inde äkrenläp tañ atqanda Quşma Ştatlar prezidentı George Bush Kongressqa kilep üzeneñ soñğı yıllıq yullamasın citkeräçäk. Xakimiättä ul yaqınça tağın ber yıl qalsa da, xäzer inde Bushnı kübräk üzeneñ dönyadağı iñ qüätle däwlät citäkçese bularaq tarixqa niçek kerep qaluı mäs'äläse dä borçıy, ul iğtibarnı şuña birer dip kötelä.

Tarixqa niçek kerü mäs'äläsendä prezident Bushnıñ çınnan da qayber awırlıqları bar. Soñğı yıllarda anı Ğiraqtağı suğış bitarlasa, bıyıl inde ul niçekter artqa çigende, anda xätta uñay täräqqiät kürenä başladı, dip xäbär itelde, ämma Bush şul dan yaqtısında nazlana almadı. Alğa yaña zur problema - Quşma Ştatlarnıñ iqtisadi xäle naçarayuı kilep bastı.

Bar dönya buylap finans bazarlar qaltırana, iqtisadçılar Quşma Ştatlar üseşendä torğınlıq köteläme dip tügel, ä ul inde başlandımı, ällä başlanırğa toramı dip kenä bäxäsläşä. Bu isä amerikan xalqın zur poşmanğa sala.

Şimbä könne yasağan ğädäti radioçığışında George Bush bıyılğı yılılq yullamasında nilär söylärgä cıyınuı xaqında bolay digän ide:

"Min soñğı cide yıl eçendä bezneñ ildäge häm annan tıştağı eşlärebezdä zur täräqqiätkä ireşüebez, häm berük waqıtta äle qayber eşlärneñ haman da qaluı, bezneñ alarnı tögällär öçen bergäläşep eşlärgä kiräk bulu xaqında söyliäçäkmen", dide Bush.

Şul tämamlanmağan häm amerikan xökümäte yağınnan xäzer zur iğtibar taläp itkän eşlärneñ berse bulıp, älbättä, iqtisad tora. Amerikan qullanuçıların toraq bäyäläreneñ tübän tägäräwe, neft kebek möhim çimallarnıñ, kiresençä, qibatlanuı, banktan aqça alunıñ da elekkegä qarağanda ğadi keşe kesäsenä nığraq suğuı kebek problemalar borçıy başladı.

Bolar barısı da asılda soñğı yıl, xätta yartı yıl eçendä tuğan problemalar. Quşma Ştatlar iqtisadı dönyadağı iñ erese bulıp tora, xökümät anı kire totrıqlı üseş yulına qaytaru maqsatında 150 milliard dollarlıq maxsus programmanı inde täqdim itte.

Borçılularnı bastırıp prezident Bush bu xaqta:

"Finans bazarlar häm toraq ölkäsendäge totrıqsızlıq sezneñ kübegezne iqtisadi torğınlıq ixtimalı xaqında poşmanğa sala, ämma sez şunı belergä tieş - soñğı aylar iqtisadi üseşneñ äkrenäyüen kürsätsä dä, şul üseşneñ kiläçäk nigezläre nıq bulıp qala birä. Min, ägär dä bez tiz genä tieşle ğämällär kürsäk, iqtisadqa yaña etärgeç birep, ul üseşen däwam iter, häm xalıq öçen yaña eş urınnarın buldırır, dip uylıym", di Quşma Ştatlar prezidentı Bush.

Xäzer inde Aq yort xucası Kongressnı, xökümäte täqdim itkän şul aşığıç çaralar planın ozaqqa suzmıy ğına raslarğa çaqıra.

George Bushnıñ tarixta üz urının ezläw mäşäqäte şaqtıy qatlawlı çorğa turı kilä şulay itep. Fiker beleşü näticälärennän kürengänçä, anıñ prezident bularaq qılğan ğämällären fikere soralğannarnıñ 30-lap qına protsentı xuplıy.
XS
SM
MD
LG