2 mart saylawında ciñüne xäzerge prezident Vladimir Putinnıñ warisı, berençe vitse-premier, berük waqıtta Gazpromnıñ da başında toruçı Dmitriy Medvedev yawlıyaçağında şiklänüçelär yuq diärlek.
Qalğan 3 namzät – kommunistlar citäkçese Gennadiy Zyuganov, LDPR partiäse başlığı Vladimir Jirinovskiy häm Demokratik partiä citäkçese Andrey Bogdanov.
Fiker beleşülärgä qarağanda, Medvedev alarnıñ barısın da yıraqta qaldırıp alda bara. Zyuganov belän Jirinovskiy küp digändä 10 protsent, Bogdanov 1 protsent ta cıyalmas dip kötelä.
Medvedevnıñ yarışqa kermiçä dä ciñüen küzätüçelär tulısınça Putinnıñ abruyı belän añlata. Putin kemgä törtep kürsätkän bulsa, prezident şul bulır ide, di alar.
Şuña da qaramastan, Kreml Medvedevtan “yaña patşa” yasaw eşen äwzem başladı. Mäğlmät çaraları, bereneçe çiratta televidenie anıñ här adımın kürsätep bara. Menä bügen dä, saylaw aldı kampaniäseneñ berençe könendä säfär belän Volgogradta yörgän Medvedev säğät buyı Rusiä televideneseneñ turı efirında utırdı.
Tänqitçelär monı namzatlär arasında ğadelsez köräş dip atıy.
Oppozitsiägä kilgändä, elekke premier Mixail Kasyanov namzät itep terkälmäde. Üzäk saylaw komissiäse ul cıyğan imzalarnıñ 13 protsentın yaraqsız dip tapqan. Kasyanov kiläse saylawnı "fars" dip aradı häm tarafdarların anda qatşanşmasqa çaqırdı.
Elekke dönya çempionı şaxmatçı Garri Kasparov ta liberal oppozitsiä wäkile bularaq saylawda qatnaşmaqçı ide. Läkin anıñ tarafdarlarına täqdim itü cıyılışın ütkärü öçen Mäskäwdä bina birelmäde.
Tağın ber oppozitsiä wäkile Boris Nemtsov, bu saylawnıñ mäğnäse yuq dip, anda qatnaşudan baş tarttı.
Saylaw aldı kampaniäse äle başlanmas borın, Mäskäw belän Yewropada iminlek häm xezmättäşlek oyışmasınıñ saylawlarnı küzätüçe buını arasında nizaq quptı.
Comğa könne Rusiäneñ tışqı eşlär ministrlığı räsmie bu oyışmanı 2 mart saylawına ayaq çalu niätendä ğayepläde.
"Bu oyışma bezneñ täqdimnärgä açıqtan-açıq sabotaj qıluın däwam itä. Şuña kürä bez möstäqil däwlätlär prinsibı nigezendä xäräkät itäçäkbez" dide minsitrlıq räsmie Sergey Ryabkov.
Yewropada iminlek häm xezmättäşlek oyışması saylawğa çaqırılğan küzätüçelär sanın arttırırğa häm alarğa Rusiägä irtäräk kilergä röxsät sorağan ide. Mäskäw üzeneñ çikläwlären almasa, oyışma 2 mart saylawın küzätmiyäçägen belderde. Duma saylawında şulay buldı da.
Soñğı xäbärlärgä qarağanda, üzäk saylaw komissiä räise Vladimir Çurov oyışmanıñ Demokratik institutlar häm keşe xoquqları idaräse mödire Kristian Strohalnı kiläse atnada söyläşülär öçen Mäskäwgä çaqırğan.