Accessibility links

шимбә, 10 декабрь 2016, Казан вакыты 02:24

Serbiädä prezident saylawda här tawış xälitkeç bula ala


Boris Tadiç häm Tomislav Nikoliç üz tawışların sala

Boris Tadiç häm Tomislav Nikoliç üz tawışların sala

Saylaw aldı çığışlarında Demokratik partiä wäkile Tadiç saylawçılarnı Yewropa Berlegenä quşılu yulın saylarğa çaqırdı. Başqa yul Serbiäne izolyatsiägä iltäçäk dide.

Tawış birüdän soñ Tadiç "Bu Serbiädä üzenä kürä ber referendum bulaçaq. Min watandaşlarıbız bu saylawda küpläp qatnaşır dip tulısınça ışanam. Häm min bu saylawdan soñ da şul uq yuldan Yewropa Berlegenä barırbız dip tulısınça ışanam. Bu saylawnıñ täğayen näticäsen min bik zur ömet belän kötäm" dide.

Serb radikal firqası wäkile Nikoliç isä Yewropa Berlegenä genä tayanırğa yaramıy dip Mäskäw belän tığızraq elemtädä bulunı yaqlıy.

Tawış birüdän soñ Nikoliç "Serbiä Yewropa Berlege belän dä Rusiä belän dä xezmättäşlek itärgä tieş. Ämma Rusiäneñ yardäme küpkä zurraq. Rusiä bezneñ xezmättäşlektä aldan şartlar quymawçı partner. Rusiä bezneñ tärräqiätebezgä yardäm itä aluçı partner häm bügenge xäldä ul bezneñ öçen küpkä yaxşıraq partner" dide.

Azatlıq Radiosınıñ Belgradtağı xäbärçese Branka Triviç ike yaq öçen birelgän tawışlar sanı ber-berenä bik yaqın bulaçaq di. Anıñ äytüençä premyer-ministr Voislav Koştunitsanıñ koalitsiädäge berektäşe Tadiçnı yaqlawdan tıyılıp qaluı saylaw näticälärenä nıq täesir itärgä mömkin. Şulay uq Könbatış yaqlı oppozitsiädäge Liberal demokratik firqaneñ yaqlamawı da nıq täesir itäçäk.

"Koştunitsanıñ Serb Demokratik firqasen häm Çedomir Yovanoviçnıñ Liberal demokratik firqasen yaqlawçılarnıñ tawışı Tadiç öçen bik tä, bik tä möhim. Çönki bu tawışlar barlıq farazlarğa qarağanda ber-berenä bik yaqın bulaçaq" di Triviç.

2004 yılda prezident saylawnıñ ikençe turında Tadicqa ottırğan Nikoliç bıyılğı saylawnıñ berençe turında 40 protsent tawış cıyıp berençe urınğa çıqtı. Tadiç 35 protsent cıydı.

Ğämäli yaqtan qarağanda Serbiädä prezidentnıñ xakimiäte şaqtıy çiklängän. Prezident xökümätne dä tarata almıy, tışqı säyäsätne dä bilgeli almıy.

Ämma bu saylawğa şul qädär zur ähämiät birelüe saylawnıñ Kosovoda bäysezlek iğlan iteler dip kötelgän könnärgä turı kilüe belän añlatıla.

Küpçelegen albannar täşkil itkän Kosovonıñ premyer ministrı Haşimi Taçi kiçä tağın ber märtäbä Kosovo räsmi räweştä Serbiädä bäysezlegen iğlan itärgä äzer dip belderde.

"Kosovo bügen bäysezlek iğlan itärgä äzer. Bez yaña konstitutsiä äzerläwne tämamladıq. Häm min yaña däwlät tamğaların äzerläw eşeneñ dä tämalanğan diärlek buluın raslıy alam. Däwlätçelek tamğaların saylawnıñ soñğı öleşe bara. Jüri bügen alarnı saylıy häm irtägä hämma närsä äzer bulaçaq. Şulay itep Kosovo ayırım däwlät bularaq eşçänlek başlarğa äzer" dide Taçi.

Tadiç ta, Nikoliç ta Kosovonıñ bäysezlegenä qarşı. Ämma Nikoliç bu mäsälädä Tadiçtan kiskenräk çığışlar yasap kilä.

AQŞ häm Yewropa Berlegeneñ küp kenä illäre Kosovo bäysezlegen yaqlıy, Rusiä isä qatğıy qarşı.
XS
SM
MD
LG