Accessibility links

җомга, 9 декабрь 2016, Казан вакыты 01:08

Yewropa Berlege Kosovoda 2 meñläp politsiä häm idarä xezmätkären urnaştıru qararın rasladı. Bu idarä 1999 yıldan birle eşläp kilgän BMO idaräsen alıştıraçaq häm Kosovoğa tulı bäysezlekkä küçü çorında yärdäm itäçäk.


Şulay itep, Kosovo Berläşkän Millätlär qaramağınnan Yewropa Berlege qaramağına küçä. Yaña idaräneñ qayçan eşli başlayaçağı älegä tögäl äytelmäde, läkin ul bäysezlek iğlan itelgängä qädär bulaçaq, dip kötelä.

Bu wazifa Kosovo häm Balkan öçen genä tügel, ä Berlekneñ üze öçen dä bik ähämiätle. 27 ildän torğan poşmas oyışmağa şaqtıy çeterekle eş başqarırğa tieş bulaçaq – Serbiäneñ bişege sanalğan, läkin xäzer nigezdä albannar yäşägän töbäkneñ tawış-tınsız Serbiädän ayırılıp çığuın täemin itergä.

Parijdağı İminlek institutında Balkan belgeçe Judy Butt süzlärençä, Berlekkä bu eştä Bosniä täcribäse yärdäm itä ala.

"Bosniä-Hertsegovinada 2003 yılğan xärbi idarä, aña qädär politsiä idaräse ide, ä 2002 yıldan alıp anda Yewropa Berlegeneñ maxsus wäkile buldı. Yağni bu küzlektän Bosniä ürnäk bula ala. Läkin Kosovoda eşlär kübräk" di Balkan belgeçe.

Kosovo xökümäte, töbäktäge tatulıqnı bozuğa yünälgän berär adım yasasa, bigräk tä serb azçılığına qarata, Yewropa Berlege idaräseneñ bu ğamälne tuqtatu wäkäläte bulaçaq.

"Kosovoda ber xalıqara sivil wäkil bulaçaq, berük waqıtta ul Yewropa Berlegen dä wäkillek itäçäk. Berlek räsmiläre töbäktäge wazğiätne kön sayın küzätep barırğa tieş bulaçaq, säyäsi kontrol – Brusseldä" di Judy Butt.

Eşlär qızuğa kitsä, Yewropa Berlege idaräse yärdämgä NATO köçlärenä möräcäğät itä ala. Bu töbäktä NATOnıñ 17 meñläp xärbie bar.

Belgeçlär fikerençä, bu Yewropa Berlege idaräse distä yıllap ğamäldä bulaçaq. Kosovo Yewropanıñ bäysez ilenä äylängänçegä qädär.
XS
SM
MD
LG