Accessibility links

якшәмбе, 4 декабрь 2016, Казан вакыты 17:20

Olı Sişämbe açıqlıq kertä almadı


John McCain Olı Sişämbedä ciñüen bäyräm itä, Phoenix, 05.02.2008

John McCain Olı Sişämbedä ciñüen bäyräm itä, Phoenix, 05.02.2008

Sişämbedä Amerikanıñ beryulı 24 ştatında ike partiäneñ prezidentlıqqa namzätläre öçen tawış birülär ütte. Olı Sişämbe dip atalğan bu kön respublikannardan John McCainnı alğa çığardı. Demokartlardan Hillary Clinton belän Barack Obama tersäkkä-tersäk köräşä.


Kemder Amerikadağı 50 ştatnıñ beryulı yartısında diärlek ütkän berençel saylawlar Aq Yort öçen barğan köräşkä açıqlıq kerter dip uylağan bulsa – yalğıştı. Olı Sişämbe, ä Amerikada bu kön şulay atala, kötelmägän näticälär belän cawapsız sorawlar da kiterde.

Respublikannar arasında iñ şaq qattırğanı – iñ ölkän namzät – John McCain buldı. 71 yäşlek senator California, İllinois, New York kebek ähämiätle ştatlarda ciñep, üzeneñ yäşräk häm bayraq köndäşlären artta qaldırdı.

"Min üzemne berqayçan da başqalardan ömetsezräk sanamadım. Läkin, bügennän başlap bez inde şulay äytergä tieşbez: Amerikan prezidentlığına respublikan namzäte ul - bez" dide John McCain.

Şul uq waqıtta, McCainnıñ firqädäşe, elekke gubernator Mike Huckabee kötmägändä könyaqtağı 5 ştatta ciñde häm älegä çigenergä cıyınmıy:

"Bügen bez küplärne ğäcäpkä qaldırıp, äle dä ayaqta toruıbıznı kürsättek, duslar, bez moña ireştek" dide Mike Huckabee.

Nixayät, öçençe respubikan Mitt Romney 6 ştatta ciñde häm ul da älegä ömeten özep betermi.

Demokratlar arasında wazğiät tağı da kiskenräk.
Hillary Clinton, New York, 05.02.2008

Hillary xanım Clinton California, New York kebek ere ştatlarda ciñde. Küzätüçelär fikerençä, ul sälämätlek, mäğärif häm sotsial ölkädä wäğdäläre belän urta sıyınıf saylawçısın üz yağına awdara alğan.

"Bügen bez ber tawıştan balağa uqu şartları, moxtacğa yärdäm birü, iqtisadnı tergezü, suğışnı beterü, millätne sixätländerü, dönyanı citäkläw mömkinlege sorıybız. Min beläm, bez moña äzer. Barığızğa da räxmät" dide Hillary Clinton.

Hillary xanım ere ştatlarda ciñsä, anıñ firqädäş köndäşe Barack Obama wağraq ştatlarnı yawladı. Obama üzen şaqtıy ışanıçlı tota. Küzätüçelär fikerençä, ul xäzer Clinton "basuı" sanalğan afro-amerikan bistälärendä häm uqımışlı saylawçılar arasında da uñış qazana.

Barack Obama, Chicago, 05.02.2008
"Bezneñ waqıt citte. Niätebez citdi. Amerikağa üzgäreş kilä" dide Barack Obama.

Näticädä, delegatlar tawışın çağıştırıp qarağanda, Obama belän Klinton yaqınça ber çama tawış cıyğan. Bu iñ möxime. Çönki yarışnıñ bu öleşendä köräş ştatlar öçen tügel, ä delegatlar öçen bara. Partiä qorıltayında namzätne näq menä delegatlar saylayaçaq.

Respublikan namzäte bulu öçen meñnän artıq delegat tawışı kiräk. McCainnıqı xäzer 600dän arttı, yağni ul bu sanğa şaqtıy yaqınaydı.

Ä menä demokrat namzäte bulu öçen 2 meñnän artıq delegat tawışı kiräk. Clintonnıqı xäzer 700-dän, Obamanıqı – 600-dän artıq. Yağni, alar arasında köräş äle alda.

Mart häm April ayında berençel saylawlar Ohio, Texas häm Pennsylvania ştatlarında ütäçäk.

XS
SM
MD
LG