Accessibility links

дүшәмбе, 5 декабрь 2016, Казан вакыты 01:23

Олы Сишәмбе: көрәш дәвам итә


Джон Маккэйн: президентлыкка республикан намзәте ул - без!

Джон Маккэйн: президентлыкка республикан намзәте ул - без!

Сишәмбедә Американың берьюлы 24 штатында ике партиянең президентлыкка намзәтләре өчен тавыш бирүләр үтте. Олы Сишәмбе дип аталган бу көн республиканнардан Джон Маккэйнны алга чыгарды. Демократлардан Һиллари Клинтон белән Барак Обама терсәккә-терсәк көрәшә.


Кемдер Америкадагы 50 штатның берьюлы яртысында диярлек үткән беренчел сайлаулар Ак Йорт өчен барган көрәшкә ачыклык кертер дип уйлаган булса – ялгышты. Олы Сишәмбе, ә Америкада бу көн шулай атала, көтелмәгән нәтиҗәләр белән җавапсыз сораулар да китерде.

Республиканнар арасында иң шаккаттырганы – иң өлкән намзәт – Джон Маккэйн булды. 71 яшьлек сенатор Калифорния, Иллиноис, Нью-Йорк кебек әһәмиятле штатларда җиңеп, үзенең яшьрәк һәм баерак көндәшләрен артта калдырды.

"Мин үземне беркайчан да башкалардан өметсезрәк санамадым. Ләкин, бүгеннән башлап без инде шулай әйтергә тиешбез: Американ президентлыгына республикан намзәте ул - без", диде Джон Маккэйн.

Шул ук вакытта, Маккэйнның фиркадәше, элекке губернатор Майк Һакаби көтмәгәндә көньяктагы 5 штатта җиңде һәм әлегә чигенергә җыенмый:

"Бүген без күпләрне гаҗәпкә калдырып, әле дә аякта торуыбызны күрсәттек, дуслар, без моңа ирештек", диде Майк Һакаби.

Ниһаять, өченче респубикан Мит Ромни 6 штатта җиңде һәм ул да әлегә өметен өзеп бетерми.

Демократлар арасында вазгыять тагы да кискенрәк.

Һиллари ханым Клинтон Калифорния, Нью- Йорк кебек эре штатларда җиңде. Күзәтүчеләр фикеренчә, ул сәламәтлек, мәгариф һәм социаль өлкәдә вәгъдәләре белән урта сыйныф сайлаучысын үз ягына аудара алган.

Һиллари Клинтон: Без моңа әзер!
"Бүген без бер тавыштан балага уку шартлары, мохтаҗга ярдәм бирү, икътисадны тергезү, сугышны бетерү, милләтне сихәтләндерү, дөньяны җитәкләү мөмкинлеге сорыйбыз. Мин беләм, без моңа әзер. Барыгызга да рәхмәт", диде Һиллари Клинтон.

Һиллари ханым эре штатларда җиңсә, аның фиркадәш көндәше Барак Обама ваграк штатларны яулады. Обама үзен шактый ышанычлы тота. Күзәтүчеләр фикеренчә, ул хәзер Клинтон "басуы" саналган афро-американ бистәләрендә һәм укымышлы сайлаучылар арасында да уңыш казана.
Барак Обама: Безнең вакыт җитте!
"Безнең вакыт җитте. Ниятебез җитди. Америкага үзгәреш килә", диде Барак Обама.

Нәтиҗәдә, делегатлар тавышын чагыштырып караганда, Обама белән Клинтон якынча бер чама тавыш җыйган. Бу иң мөһиме. Чөнки ярышның бу өлешендә көрәш штатлар өчен түгел, ә делегатлар өчен бара. Партия корылтаенда намзәтне нәкъ менә делегатлар сайлаячак.

Республикан намзәте булу өчен кимендә 1191 делегат тавышы кирәк. Маккэйнныкы хәзер 703 булды, ягъни ул кирәкле санга шактый якынайды.

Ә менә демократ намзәте булу өчен 2025 делегат тавышы кирәк. Клинтонныкы хәзер 845, Обаманыкы – 765 булды. Ягъни, алар арасында көрәш әле алда.

Март һәм апрель аенда беренчел сайлаулар Оһайо, Тексас һәм Пенсильвания штатларында үтәчәк.

XS
SM
MD
LG