Accessibility links

Кайнар хәбәр

Rusiä xalıqara küzätüçelär belän talaşuın däwam itä


Christian Strohal Mäskäwneñ ücätlänep küzätüçelärgä qarşı buluın añlamıy
Christian Strohal Mäskäwneñ ücätlänep küzätüçelärgä qarşı buluın añlamıy

Rusiädäge prezident saylawı da bäysez küzätüçelärdän başqa ğına ütärgä tora: bu eşlärne başqaruda zur abruy qazanğan töp oyışma - Yewropada iminlek wä xezmättäşlek oyımasınıñ demokratik institutlar häm keşe xoquqları idaräse tawış birügä kilmäyäçägen belderde. Monı ul Rusiä xakimiäteneñ küzätü eşlärenä törle kirtälär qoruı belän añlattı. Näq şunı uq räsmi Mäskäw Duma saylawı aldınnan da eşlägän ide.

Demokratik institutlar häm keşe xoquqları idaräseneñ atnakiç iğlan itkän belderüendä, Rusiä xakimiäte üzenä xalıqara küzätüçelärne çaqıru ölkäsendä törle kirtälär qoruın däwam itä, häm şul säbäple bu idarä martnıñ 2-senä bilgelängän saylawğa wäkillären cibärä almayaçaq, dielä.

Mäskäw elegräk, bu oyışmanıñ küzätüçeläre Rusiägä 20-nçe fivraldän, ike atnadan da irtäräk kilä almıylar digän taläp quyğan ide. Ämma törle illärdäge tawış birüneñ ğadellegen küzätep baruda zur täcribä tuplağan älege oyışma, küzätü eşläre üz eçenä saylaw könen genä tügel, ä aña äzerlekne dä ala dip, wäkilläreneñ Rusiägä iñ soñı 15-endä kilüen teläde.

Soñğı täräqqiät, yäğni bu yulı da Rusiä saylawın küzätä almayaçaqları xaqında Demokratik institutlar häm keşe xoquqları idaräse başlığı Christian Strohal radiobızga:

"Min mondıy xällär kilep çığuğa ükenäm älbättä. Bez üz yağıbızdan, eşebezne yuğarı hönäri däräcädä başqaru kiräklegen añlatu öçen barın da eşlädek", dip belderde.

Şuşı oyışma belän Mäskäw Kremle arasında ızğış inde şaqtıydan bara. Mäskäw anıñ küzätüçelärenä kirtälär quyıp alarnı inde Duma saylawına uq kitermägän ide. Dikäberdäge tawış birü şulay itep, nigezdä Rusiä xakimiäte süzenä qarşı töşmägän quştan küzätüçelär belän genä uzdı.

Demokratik institutlar häm keşe xoquqları idaräse eşen isä Könbatış xökümätläre elek sover cirlärendäge saylawnıñ ğadellegen häm ireklegen bäyäli alırlıq xälitkeç ber faktor itep kürä. Mäskäw moña, Könbatış bu oyışmanı Rusiäne bitärläw öçen qullana dip belderä.

Atnakiç Mäskäwdä uzğan matbuğat oçraşuında Rusiä tışqı eşlär ministrı Sergey Lavrov şul ğäyepläwgä işarä yasağan süzlären qabatladı:

"Bu oyışma qağidälärne üze uylap çığara. Töp problema biredä şunda ki, alar hiç añlarlıq tügel. Bez alarnıñ biregä üz wäkillären ni öçen ber ay qala cibärergä teläwen añlamıybız. Ğomumän, alar monda ni eşlärgä teli, hiç bilgele tügel", di Lavrov.

Strohal Rusiä yağınıñ bu ğäyepläwen kire qağa häm 4 yıl elek, 2004-täge prezident saylawına bernindi dä kirtälär quyılmawın iskä töşerä. Ul çaqta Rusiä belän xezmättäşlek bernindi problemalarsız bardı, ni öçen xäzer genä Mäskäw törle çikläwlär uylap çığara, dip baş watalar Demokratik institutlar häm keşe xoquqları idaräsendä.
XS
SM
MD
LG