Accessibility links

пәнҗешәмбе, 8 декабрь 2016, Казан вакыты 05:11

Yukos keşese törmädän xastaxanägä küçerelä. Ülem xälendä


Vasiliy Aleksanyan Mäskäw mäxkämäsenä kiterelde

Vasiliy Aleksanyan Mäskäw mäxkämäsenä kiterelde

Xoquq yaqlawçılar häm Yewropa mäxkämäse basımınnan soñ, Rusiä räsmiläre Yukosnıñ elekke vitse-prezidentı, qatı awırğan Vasiliy Aleksanyannı törmädän xastaxanägä küçerergä rizalaştı. Ul arada, Aleksanyannı yaqlap açlıq iğlan itkän häm şulay uq törmädä utırğan Yukosnıñ elekke başlığı Mixail Xodorkovskiy, Putin çorında qanunçılıqqa kilgän zıyannı Dmitriy Medvedev tözätä almayaçaq, dip belderde.


Yukos şirkäteneñ elekke vitse-prezidentı Vasiliy Aleksanyan öçen monı keçkenä bulsa da, ciñü dip atarğa buladır. 18 ay törmä şartlarında anıñ AİDS, yağni SPİD awıruı 3b dip atalğan awır däräcäğä citkän. Bizlärendä yaman şeş buluı raslanğan, östäwenä tuberkulez eläktergän. Advokatlar äytüençä, ul inde kürmi, diärlek.

Xoquq yaqlawçılar anı törmädän maxsus xastaxanägä küçerergä ütende. Yewropanıñ keşe xoquqları mäxmäkämäse bu xaqta ber-ber artlı 3 qarar çığardı. Yewropa parlamentı deputatları Rusiä prezidentı, premierı, baş prokurorı isemenä möräcäğätlär yulladı.

Nixayät, atnakiç könne Aleksanyannı xastaxanägä küçerergä qarar itelgän.

"Mine şul ğına borçıy, bu inde şaqtıy soñdır. Çönki, bu waqıt eçendä anıñ bizlärednä yaman şeş, häm bälki tuberkulez östälgän" dide Aelksanyannıñ advokatı Drew Holiner.

36 yäşlek Vasiliy Aleksanyan 2006nıñ aprelendä qulğa alınğan ide. Aña qädär ul Yukosnıñ xoquq idaräsen citäkläde, törmädä utırğan Mixail Xodorkovskiynıñ advokatı ide. Prokuratura anı şul uq salımnan qaçu, üzläşterülärdä ğayepli. Aleksanyan üzenä belderelgän bar ğayepläwlärne kire qağa. Prokuraturanıñ üzen Xodorkovskiy isemenä yala yağuğa etärüdä ğayepli.

8 yıl törmägä xökem itelgän häm xäzer Çita törmäsendä utırğan Mixail Xodorkovskiy Aleksanyannıñ yaqlap açlıq iğlan itte.

Şuşı könärdä ul Financial Times gäzitenä zur äñgämä birde. Bu äñgämäsendä ul Putin rejimı Rusiäneñ qanunçılığına kitergän zıyannı anıñ warisı Dmitriy Medvedevnıñ tözätä alaçağına şik belderde. Rusiädäge traditsiä, xalıqnıñ aqıl däräcäse häm dä qanunçılıq yaqlı köçlärneñ citmärlek bulmaw – bolar barısı da yaña citäkçegä qarşı bulaçaq, dip sanıy Mixail Xodorkovskiy.

XS
SM
MD
LG