Accessibility links

якшәмбе, 4 декабрь 2016, Казан вакыты 15:22

Alda torğan prezident saylawı xaqında Rusiä xalqınıñ fikere inde mäğlüm - küpçelek anda qatnaşırğa cıyınsa da, tawış birüneñ ğadel buluına ışanmıy häm Mäskäw Kremle ciñüçene inde bilgeläp quydı, dip isäpli. Berük waqıtta xalıqnıñ moña ällä ni ise dä kitmi, saylawnıñ şulay oyıştırıluına ışansa da, ğadi keşelär yaña prezident kilgäç tä tormış şartlarınıñ yaxşıruına ömetlänä.


Rusiä xalqınıñ aldağı prezident saylawına qarağan şuşı fikerläre Azatlıq radiosı quşuı belän ütkärelgän maxsus tikşerenü näticälärennän bilgele buldı. Ul ğinwarnıñ 11-21-endä Levada üzäge tarafınnan oyıştırılğan ide.

Näticälär Rusiä xalqında şaqtıy qızıqlı, häm urını belän xätta qarşılıqlı da qaraşlar buluın açıqladı. Keşelär warisnıñ inde aldan bilgelänüen belä häm şuña da prezidentnıñ çın mäğnäsendä ğadi xalıq tarafınnan saylanuına ışanmıy. Başqa nämzätlärneñ köräştä qatnaşuında ällä ni zur mäğnä yuq, tawış birü irekle häm ğadel tügel. Fikere soraşqannarnıñ küpçelege asılda şulay dip uylıy.

Läkin şuña da qaramastan, alarnıñ dürttän öç öleşe martnıñ 2-sendä uzaçaq tawış birüdä qatnaşırğa cıyına. Ä ul saylawda xäzerge prezident waris itep bilgelägän Dmitri Medvedev ciñer dip kötelä.

Fiker beleşü açıqlağan bu qaraşlarnı qayber säyäsät belgeçläre, Rusiä cämğiätendä üzenä kürä ber sotsial' kileşü barlıqqa kilü belän añlata. Cämäğätçelek xakimiät belän, sez bezgä azmı-küpme totrıqlılıq häm yaxşı yäşäw şartları tudırasız, ä bez sezgä şunıñ öçen yomşaq yaqlawıbıznı biräbez, dip kileşä.

Mäskäwdäge Carnegie üzägennän Nikolay Petrov:

"Kilep tuğan şartlarda, yäğni xalıqqa yazılmağan ber kileşü birelep, alar küpmeder däräcädä irekleklärgä iä bulğan häm yäşäw şartları yaxşırğan ber mäldä, ğadi xalıq xakimiätlärgä "bezneñ xälne naçaraytmağanda teläsä nişlägez şunda" digän işarä birä. Şunlıqtan, keşelär saylawnıñ ğadel ütüenä ayırım iğtibar birep tä tormıy", di Nikolay Petrov Rusiä xalqınıñ tawış birügä bitaraf qarawı turında.

Çınnan da, Azatlıq quşuı belän uzdırılğan fiker beleşü 40-45 protsent xalıqnıñ, saylaw tormış standartlarınıñ tağın da yaxşıruına kiteräçäk dip uylawın kürsätä.

Levada üzägendä eşläwçe Boris Dubin fikerençä, keşelärneñ şuşı ömetläre yaña prezidentnıñ Putin yulınnan baraçağına ışanu belän bäyle.

"Rusiälär ömetlängän töp närsä şul - alar Putin yulınnan baru däwam itäçäk dip uylıy, häm Medvedevnı Putinneñ däwamçısı itep kürä", di Dubin.

Rusiädäge saylawnıñ ğadel ütäçägenä fikere soraşqan xalıqnıñ 40-tan da azraq protsentı ışana. Bu şaqtıy tübän kürsätkeç, ämma ikençe yaqtan, üktäbrdä uzğan tikşerenü sannarı belän çağıştırğanda, Rusiälärneñ tawış birü ğädellegenä ışanuı küpkä artqan - Duma saylawları aldınnan bu kürsätkeç ike märtäbä zurraq ide.

Berük waqıtta xalıqnıñ 65 protsentı barıber, saylaw näticäse Putin häm Kremldäge xakimiätkä bäyle, dip uylıy.




* Azatlıqnıñ fiker beleşü näticlären biredä kürep bula.
XS
SM
MD
LG