Accessibility links

шимбә, 3 декабрь 2016, Казан вакыты 22:42

Obama alğa urğıla häm demokrat nämzät bulu şansın arttıra


Obama: "Bez Washingtonnı yawlağançı köräşäçäkbez!"

Obama: "Bez Washingtonnı yawlağançı köräşäçäkbez!"

Amerikan prezidentı bulu öçen köräşüçe töp nämzätlär üz maqsatlarına taba yaña ber adım yasadı - Virginiä, Maryland ştatlarında häm Kolumbiä bülgesendä çirattağı berençe saylawlar ütte. Alarnıñ näticälärenä bigräk tä respublikannardan John McCain häm demokratlardan Barack Obama quana, partiä tawışlarınıñ zur öleşen näq menä alar qazandı. Obama öçen bu ciñü xälitkeç bula ala.

McCainneñ respublikan nämzätlär arasında alğa çığuı inde küptännän açıqlansa, demokratlarda älegä Hillary Clinton belän Barack Obama arasında köräş bertigez bara ide.

Sişämbe könne Virginiä, Maryland häm Kolumbiä bülgesendä uzğan çirattağı berençel saylaw isä moña xälitkeç ber üzgäreş kertte - xäzer inde demokratlarda da keçkenä genä bulsa da alğa urğılış bar.

46 yäşlek Obama, üzeneñ Marylandta, Virginiädä otuın, östäwenä ilneñ başqalası urnaşqan Kolumbiä bülgesendä dä ciñüen iskä alıp, "bezneñ şuşı xäräkät başqala Washingtonda üzgäreşlär yasağançı däwam itäçäk, bez şul yuldan barabız!", dip belderde.

Hillary Clinton da bireşergä cıyınmıy
Obamanıñ ciñüläre ayırım ştatlarda ğına tügel, ä ğädättä Clintonnı yaqlawçı sanalğan sotsial' törkemnär simpatiäsen qazanuda da kürenä. Moña qädär xatın-qızlar, aqtänle eşçelär häm olıraq saylawçılar yaqlawın Hillary qazanıp kilgän ide. İspan telle xalıq ta üz tawışın näq menä Clintonğa birep kilde.

Bu qağidä şuşı sişämbedä yuqqa çıqtı. Elek nigezdä qaratänlelär häm yäşlärne cälep itkän Obama bü büleneşne beterde diärgä bula. Soñğı saylawda ul yaqlawnı irlärdän dä, xatınnardan da, baylardan da, fäqirlärdän dä aldı. Xätta ispantellelärneñ dä yartısı näq menä anı yaqlap çıqtı.

Şulay itep rasaçıl häm ceneslär arasındağı büleneşne beterü, berläşüne alğa sörgän Barack Obama berençe märtäbä üzeneñ kiñ qatlam xalıq yaqlawın da qazana aluın kürsätte.

Şuşı xarizmatik säyäsätçe öçen bu xälitkeç ber qazanış bula ala. Ägär dä ul şuşı uñışların däwam itep, demokratlar qorıltayında da ciñä alsa, töp nämzät itep kürsätelgän berençe qaratänle keşe bulaçaq.

Ämma Obama bu yünäleştä şaqtıy ğına eş başqarsa da, anıñ şulay tarixqa kerä aluı älegä xäl itelgän närsä tügel.

Hillary Clinton üçen mart başında Ohio häm Texas ştatlarında uzaçaq saylawda alırğa cıyına. Bu ştatlarnıñ ikesendä dä şaqtıy ğına xalıq yäşi, dimäk alarda demokratlar qorıltayına saylanaçaq wäkillär sanı da yuğarı bulaçaq. Häm älegä qädär östenlek anda näq menä Clintonğa birelep kilgän ide.
XS
SM
MD
LG