Accessibility links

сишәмбе, 6 декабрь 2016, Казан вакыты 19:10

17 fevral yäkşämbe könne Kosovo üzeneñ bäysezlegen iğlan iter dip kötelä. Simbä könne Yewropa Berlege moña üzeneñ soñğı fatixasın birde.


Şimbä könne Yewropa Berlege Kosovoğa tınıçlıq saqlaw missiäsen cibärü qararına soñğı raslawın birde. Äğza illärgä bu qararğa qarşı çığu öçen uzğan töngä qädär waqıt birelgän ide. 27 il arasında qarşı çığuçı bulmağan.

EULEX dip atalğan missiädä 1800-läp çit il keşese – politsiä, mäxkämä, prokuratura xezmätkärläre bulaçaq. Alar Kosovoğa kiläse atnada uq kilä başlar dip kötelä. Alarğa tağın meñgä yaqın cirle xezmätkär östäläçäk.

Bu missiä Kosovoda säyäsätkä qatışmağan idarä institutları tözü, korrupsiä, oyışqan cinäyätçelekkä qarşı köräş, suğış cinayätlärendä şiklänelüçelärne awlaw belän şöğellänäçäk.

Şimbä könne Kosovo premier-ministrı Haşim Taçi, Priştinada çığış yasap, 17 fevral Kosovo öçen tarixi kön bulaçaq, digän belderü yasadı.

Kosovo premier-ministrı Haşim Taçi
"İrtägä tınıçlıq häm añlaşu köne bulaçaq. Kosovo xalqınıñ telägen däwlät däräcäsendä tanu köne. Belgrad räsmiläre Kosovodağı täräqqiätkä täesir itä almıy" dide Kosovo premierı.

Kosovo albanarında bäyräm käyefläre bulsa, serblar arasında kierenkelek arta. Şimbä könne Belgradta serb millätçeläre meñlägän keşe qatnaşında qarşılıq çarası ütkärde.

Serbiäneñ yaña saylanğan prezidentı Boris Tadiç comğa könne parlamentta ant itkändä Kosovonı Serbiädä qaldıru öçen köräşen däwam itergä wäğdä itte.

"Serbiä respublikasınıñ häm anıñ öleşe bulğan Kosovo häm Metoxiäne dä kertep, bötenlegen häm möstäqillegen saqlap qalu öçen bar köçemne birergä ant itäm. Şulay uq, keşe xoquqların, azçılıq xoquqların häm ireklekne saqlayaçaqmın" dide Serbiä prezidentı.

Räsmi Belgrad beryaqlı bäysezlek iğlan itkän Kosovoğa qarşı diplomatik häm iqtisadi çaralar kürü belän yanıy, ämmä köç qullanmayaçağın belderä.

Kosovo premier-ministrı Haşim Taçi, comğa könne Priştinada jurnalistlar belän oçraşuda, tağın ber tapqır, töbäktäge serb azçılığınıñ kimsetelüenä yul quyılmayaçaq, dip ışandırdı.

"Bäysez Kosovoda ber watandaş ta kimsetelmäyäçäk. Kosovo xökümäte dä, şäxsän üzem dä, watandaşlarnı saqlaw eşenä bar köçebezne biräçäkbez, azçılıq xoquqlarınıñ konstitusiä tarafınnan saqlanuın täemin itäçäkbez" dide Kosovo premierı.

Yewropa Berlege häm Quşma Ştatlar Kosovonıñ bäysezlegen xuplıy. Serbiä häm Rusiä kisken qarşı çığa.

Yewropa Berlegeneñ Kosovo missiäsenä töp öleşne Germaniä, İtaliä häm Britaniä kertäçäk. Berük waqıtta anda Yewropa Berlegenä kermägän illärdän – Xorvatiä, Norvegiä, Şveytsariä, Törkiä häm Quşma Ştatlardan dä wäkillär bulaçaq.


XS
SM
MD
LG