Accessibility links

сишәмбе, 6 декабрь 2016, Казан вакыты 19:15

Kosovo parlamentı maxsus utırışta Kosovonıñ bäysezlegen iğlan itte. Utırıştağı 109 deputatnıñ barısı da bäysezlek öçen qul kütärep tawış birde.


Premer-ministr Haşim Taçi bäysezlek deklarasiäsen uqıp yaña däwlät "töbäktä tınıçlıq häm totrıqlılıqqa tuğrılıqlı bulaçaq", "kürşeläre belän yaxşı mönäsäbättä torırğa teli" dide.

Kosovonıñ bäysezlek deklarasiasen totqan Kosovo räsmie12 matdädän torğan Bäysezlek deklarasiasendä Kosovo demokratik, dönyawí häm küpmillätle cämğeyät dielä.

Deklarasiadä Kosovo däwläteneñ elekke Finländiä prezidentı Martti Ahtisaari äzerlägän BMO planı nigezendä barlıqqa kilüe äytelä. Ul planda Kosovonıñ xalıqara idarä qaramağındağı bäysezlege turında äytelgän ide.

Serbiä ul planğa qarşı çıqtı. Serbiäneñ berektäşe bulğan Rusiä BMO İminlek Şurasında ul planğa kirtä quydı.

Parlament utırışı aldınnan prezident Fatmir Seydiü elekke prezident İbrahim Rugova qäberenä bardı. Seydiü ziratta jurnalistlarğa "Bu kön Kosovo öçen üzençälekle kön. İrekle häm demokratik illär ğailäsenä quşıluçı Kosovoda demokratik tärräqıyatneñ yaña çorı başlana" dide.

Kosovo parlamentınıñ bügen bu utırışnı ütkäräçäge soñğı könnärdä xäbär itelgän ide. Şuña kürä bügen irtän ük qar yawğan Priştina uramnarına xalıq bäyrämgä äzerlänü käyefe belän çıqtı.

Azatlıqnıñ Priştinadağı xäbärçese Ardana Vidişiki "Priştinanıñ böten cirenä, Kosovonıñ böten cirenä älämnär tulğan. Härber binada, uramnarda, härber maşínada, küpçelek balqonnarda älämnär. Böten cirdä muzıka uynıy" dide.

Kosovo albannarı Alban, AQŞ, Britan, Yewropa Berlege häm NATO älämnären bolğap, feyerwerklar belän inde şimbä kiçendä ük bäyräm itä başlağan ide.

BMO, NATO häm cirle köçlär bäysezlek iğlan itü könnärendä iminlek çaraların arttırdı. Älegä tärtipsezlek oçraqları turında xäbärlär bulmadı.

Kosovoda azçılıqnı täşkil itüçe serblar bu parlament utırışına qarşı protest çaraları ütkärde, ğıybadät qıldı.

Belgradta yözlärçä serb Serbiäneñ Kosovonı yuğaltuına qarşı uram cıyınına kilde.

Parlament bäysezlek iğlan itärgä berniçä minut qına qala Serbiä prezidentı Boris Tadiç Serbiä Kosovonıñ bäysezlegen berqayçan da tanımıyaçaq dip belderde. Tadiç Serbiä bu qararnı ğämäldän çığaru öçen barlıq tınıç, diplomatík häm xoquqıy çaralarnı qullanaçaq dide.

Ämma Quşma Ştatlar häm Yewropa Berlegendäge küp kenä illär Kosovonı yaña däwlät bularaq tanır dip kötelä.

Aq Yort AQŞnıñ yuğarı räsmiläre Kosovonıñ bäysezlek iğlan itüenä bäyle tirän xislärne añlap Rusiä häm Serbiä räsmiläre belän elemtädä tora dip belderde. Süzçe Dana Perino äytüençä, däwlät sekretare Condoleezza Rice häm AQŞnıñ däwlät iminlek kiñäşçese Stephen Hadley Rusiä häm Serbiädäge kollegälärı belän elemtägä kergän.

Şimbä könne Yewropa Berlege däwlätläre Kosovodağı xäzerge BMO idaräsen alıştıru öçen anda 1800 keşelek polisiähäm idarä törkeme cibärüne täğäyenläde.

Kosovodağı Yewropa Berlege idaräsendä çit il xezmätkärlärennän tış ber meñläp cirle xezmätkär dä bulaçaq.

Yaña idarä aldağı 4 ayda urnaştırılaçaq häm Kosovoda säyäsi tıqşınulardan azat bulğan polisia, ustisia häm tamojnä sistemasın urnaştırırğa yärdäm itäçäk.
XS
SM
MD
LG