Accessibility links

пәнҗешәмбе, 8 декабрь 2016, Казан вакыты 12:53

Мәскәүгә террор кайтты


Дүшәмбе иртән Мәскәү меторсының ике станциясендә булган шартлаулар нәтиҗәсендә кимендә 38 кеше һәлак булды, дистәләрчәсе - яраланды. Хакимият шартлауларны террор гамәле дип бәяләде һәм тикшеренү ачып җибәрде.



Беренче шартлау иртәнге 8 тулып килгәндә Мәскәү метросының кызыл линиясендәге "Лубянка" станциясендә булды. Якынча 40 минут аерма белән икенче шартлау шул ук линиянең "Парк Культуры" станциясен тетрәтте. Хәзерге вакытта метроның бу линиясендә "Спортивная" белән "Комсомольская" станцияләре арасында хәрәкәт туктатылган.

Үлүчеләр саны үзгәреп тора: метро идарәсе вәкиле башта "Лубянка"да 40лап, ә "Парк Культуры"да - 20ләп кеше һәлак булды дип белдергән иде. Соңрак Русия прокуроры үлүчеләр санын 37 дип билгеләде. Кичкә таба бу сан да үзгәрде - хастаханәдә шартлауда яраланган тагын бер кеше вафат булды, шулай итеп үлүчеләр саны 38-гә җитте.

Шартлаулар метро треннары (поездлары) станцияләрдә торган чакта булу сәбәпле, корбаннар трен эчендәгеләр дә, платформада торганнар арасында да булган.

"Лубянка" станциясе Русиянең Федерал иминлек хезмәте (ФСБ) башидарәсе якынында урнашкан.

Бу станциядә хәзерге вакытта 40 ашыгыч ярдәм машинасы һәм һәлакәтләр медицинасы үзәге төркеме эшли.

Русия хакимияте шартлауларны шунда ук террор гамәле дип бәяләде. Мәскәү прокуратурасының Тикшеренү комитеты вәкиле Владимир Маркин, тикшеренү эшләрен террор матдәсе нигезендә ачылуын әйтте.

Берүк вакытта Гадәттән тыш хәлләр министрлыгы, "Проспект Мира" станциясендә дә өченче шартлау булуын кире какты, бу хакта Мәскәүдәге кайбер мәгълүмат чыганаклары хәбәр иткән иде.

фикерләрне күрсәт

XS
SM
MD
LG