Accessibility links

сишәмбе, 6 декабрь 2016, Казан вакыты 08:57

Yäkşämbe könne Törkiädä uzğan cirle saylawda bu yulı da AK partia küpçelek tawış belän ciñep çıqtı. Ämma, yaqlap tawış birüçelär sanı kimigän. Erdoğan monı xalıqnıñ üzençä kisätüe itep qabul itte.

Törkiä premerı Tayip Erdoğan yäkşämbe uzğan cirle saylawda üz partiasenä bulğan yaqlawnıñ kimüen kürep, näticä belän "qanäğät" bulmawın belderde.

AK partiane yaqlap tawış birüçelärneñ kimüen, Tayip Erdoğan, xalıqnıñ üzençä kisätüe itep qabul itte. "Xalıqnıñ bu yullaması, häryaqlap qaralaçaq", dip soñğı wäzğiätkä bäyä birde ul.

“Ğädellek häm täraqiät” partiase AKP 2002 yılda 34 % tawış cıyıp xakimiat başına kilgän ide. 2004 yılda bulğan cirle saylawda AK partiane yaqlawçılar 42 % artqan, 2007 yılda isä bu san ğömüm saylawda 47 % citkän ide.

Yäkşämbe könne uzğan cirle saylawda isä räsmi bulmağan mäğlümatlarğa qarağanda, AK partia 38.87 % tawış cıydı.

16 zur şähärneñ 10-sında AKP ciñde (täfsille)

Oppozisia canlana

Şul uq waqıtta, AK partiagä köndäş sulçı “Cömhüriätçe xalıq” partiase CHP tawışlarnıñ 23.16 % aldı. Bu 2007 yıldağı saylaw näticäläre belän çağıştırğanda şaqtıy zur kürsätkeç.

Monnan qala uñçı “Millätçe xalıq” partiase MHP dä 16.12 % tawış cıyğan. Elekke näticälärgä qarağanda, bu partiagä dä tawış birüçelärneñ sanı artuı kürelä.

İlneñ kördlär küpläp yäşägän Diyarbak`r şähärendä isä, “Demokratik xalıq” partiası DTP ciñde. Xälbuki, Erdoğan körd xalqına yaqınayu säyäsäte belän, alarnıñ üz tellärendä, kördçä tapşıru yasağan TV-6 qanalı açıp, körd xalıqınıñ yaqlawın cälep itü öçen tırışqan ide.

AK partia & iqtisadi krizis

AK partiagä köndäş uñçı häm sulçı partialärgä bulğan yaqlawnıñ artuınıñ asılında "iqtisadi krizis" yata. Alar ildäge iqtisadi wäzğiätneñ naçarayuwın häm AK partianeñ bu mäsälädä uñışsız säyäsät başqaruın täqrarlap, xalıq arasında borçunı arttırdı.

2002 yılda xakimiatkä kilü belän Törkiäne iqtisadın töşenkelektän qotqarğan AK partia, bu tırışlıqnı globäl iqtisadi krizis waqıtında kürsätä almadı.

İldä eşsezlär sanı könnän-kön arta (yıl axırına qädär eşsezlek 13% artır dip isäplänä), sänäğät citeşterüe isä bik kisken töşte (ğinwar ayında 21.3 % kimede) iqtisadi üseş küzätelmi.

"AK partia säyäsäteñ üzgärtergä tieş"

Reuters xäbär agentlığında saylaw näticälärenä yomğaq yasağan, jurnalist Murat Yetkin, iqtisad mäsäläsendä AK partia säyäsäteñ üzgärtergä tieş, dide.

"Törkiädäge saylawçılar AK partiagä bik açıq itep kisätte: Partia üz säyäsäten yañadan qarap çığarğa tieş. AK partia iqtisad säyäsätendä üzgäreş kertergä mäcbür. Erdoğan saylaw aldı çaralarında ildäge iqtisadi krizisnı kürmämeşkä salındı, anıñ fikerençä, krizis Törkiäne urap uzğan ide, läkin kürenä ki, xalıq moña ışanmağan", dide ul.

Erdoğan xökümättä üzgäreşlär bulaçağın aldan uq sizsä dä, monın partia eşçänlegenä bäyle bulmawın alğa sörgän ide:

"Xökümät eçendä üzgäreşlär buluı ixtimal, läkin bu saylaw näticäsenä bäyle tügel. Üzgäreş saylaw aşa da bulırğa mömkin, saylaw bulmıyça da mömkin", dide ul.

Saylaw aldınnan kötelmägän qayğılı xäbär

Böyek Berlek partiası başlıgı Muhsin Yazıcıoğlu,

Muhsin Yazıcıoğlu Bıyılğı saylawğa külägä töşergän ber oçraqnı da iskä alıp ütärgä kiräk. Xalıqnıñ mäxäbbäten qazanğan, Törkiäneñ tanılğan säyäsätçese “Böyek Berlek” partia başlığı Muhsin Yazıcıoğlunın wafatı, böten Törkiäne borçuğa saldı. Saylawğa ber atna qalğanda, boralaq qazasına oçrap yuğalğan Yazıcıoğlu häm boralaqtağı tağın 4 keşene ezläw, qırıs hawa şartları säbäple 1-2 köngä kiçekkän ide. 3 kön soñ alarnıñ gäwdäläre taw başında tabıldı.

XS
SM
MD
LG