Accessibility links

Ğiraqta Törkiä xärbi çaralarına qarşı tänqitlär arta başladı


Bügen Törkiä wäkilläre Ğiraq räsmiläre belän küreşer öçen Ğiraqqa kilde. Alar anda Ğiraqnıñ yuğarı däwlät räsmiläre, şul isäptän Prezident Cälal Talabani häm Tışqı eşlär ministrı Hoşyar Zäbani belän oçratı.

Törkiyäneñ xärbi çaraları başta Ğiraq xaqimiäte tarafınnan cılı qarşılansa, soñgı arada Törkiä alıp barğan xärbi çaralarga qarşı tänqitlär arta başladı. Törkiänen PKK körd ğisyançılarına qarşı alıp barğan zur sallı xärbi çaraları Ğiraq xaqimiätendä rizasızlıq häm tänqitne arttıra başladı. Bolay da äle üz eçendä totrıqlıq urnaşa almağan ildä, xökümät, xärbi çaralar arqasında ğadi xalıqqa ziyan kilep monıñ Ğiraq eçendäge körd päşmärgä köçlären qotırta alaçağınnan qurqa. Şuña Ğiraq, Törkiägä cayı çıqqan sayın bu ğamalen tuqtatırğa çaqıra.

Körd päşmärgä köçläre ul töbäkne saqlağan cirle körd suğışçılar ä PKK tügel.

Ğiraq xökümäte süzçese Ali Dabbağ Ğiraqnıñ borçıluın bolay telgä ala:

”Bez Törkiä belän yaxşı mönäsäbättä torırığa telibez. Läkin Törkiä, xärbi ber xata näticäsendä wazğiätneñ qurqınıç xälgä äwerelä alaçağın da añlarga tiyeş. Päşmärgä köçläre belän Törkiä xärbiläre arasında bäreleşlär kilep çıqsa bu ğadi xalıqqa ziyan kiterä alır häm Ğiraq xaqimiäte monı telämi.”

Läkin Törkiä wäkile Davutoğlu, çaralarnı beterü öçen ber tarix bilgeläw taqdimen kire qaqtı. Ul Ğiraq räsmiläre belän söyläşkännän soñ yasağan matbuğat çığışında, maqsatqa ireşelgänçegä qadär xärbi çaralarnıñ däwam itäçägen belderde. Ğomum alğanda PKKnı betergänçegä qadär.

Şul uq waqıtta Ğiraq premyerı bu çaralarnıñ ozaqqa suzıluı, töbäkne totrıqsızlıqqa etärä alır digän borçıluın belderde.

Bu oçraqta Ğiraq xaqimiäteneñ borçılırğa xaqı bar kebek, çönki Bäğdad xaqimiäteneñ Ğiraqnıñ tönyağındağı körd avtonom töbägendä bulğan wazğiätne turıdan turı kontrol itü mömkinçelege yuq.

Päşmärgälär belän törek xarbiläre arasında ğawğa oçraqları xäbär itelä. Ber Törkiä xärbi bülege PKK bazaların tikşergändä pärmärgä suğışları belän qarşılaşa häm Päşmärgälär alarga töbäkne taşlap kitärgä quşa.

Törkiä tarafı inde 6 kön buyına däwam itkän xärbi çaranı, Tayyip Erdoğan süzläre belän äytkändä, ilneñ üz iminlege öçen “xaqlı” çara dip atıy. Çönki könyaq Törkiädäge terror çaraları tönyaq Ğiraqtağı PKK ğisyançıları tarafınnan başqarıla. Tönyaq Ğiraq isä PKK terorçıları öçen yäşerenü urını bula ide. Törkiä yağı wazğiätne bolay añlatıp, il iminlige öçen bu çaranıñ möhim buluına basım yasıy häm Ğiraqnı da monı añlarga çaqıra
Törkiä premyerı Erdoğan isä,

“Tönyaq Ğiraqta urnaşqan terorçı törkem, bezneñ totrıqlıqqa ğına tügel ul şul uq waqıtta Ğiraqnıñ säyäsi totrıqlığına da yanağan ber qurqınıç. Terrorğa qarşı urtaq köräş ike il arasındağı, säyäsi häm iqtisadi mönäbätlärebezne dä köçländeräçäk.”

AQŞ saqlanu ministrı Rober Gates, uzğan atna, Törkiäne Ğiraqtağı çaraların ozaqqa suzmasqa çaqırğan ide. Läkin ul Törkiä kürgän xärbi çarağa turıdan turı tänqit beldermäde.

Gates şul uq waqıtta matbuğat çaralarına, "Törkiänen alıp barğan xärbi çaralar distä yıllar däwam itkän PKK terorın üz başına beterergä yärdäm itmäyäçäk. Monın belän bergä Törkiä könyaqtağı küpçelek kördlär yäşägän töbäklärdä säyäsi häm iqtisadi üseşne arttıru öçen kübräk köç sarıf itärgä tiyeş" dide.
XS
SM
MD
LG