Accessibility links

шимбә, 10 декабрь 2016, Казан вакыты 11:53

Putinnıñ warisı berençe turda uq 70%-tan artıq tawış cıydı. Bu aldan bilgele näticä ide, çönki, çın oppozitsiä yarışqa kertelmäde, ä mäğlümät çaralarında töp urın Medvedevqa birelde, di küzätüçelär.


Yewropa şurasınıñ parlament mäclese törkeme 2 mart saylawın küzätkän siräk xalıqara törkemeneñ berse buldı. Törkem citäkçese Andreas Gross süzlärençä, saylaw näticäläre saylawçınıñ fikeren çağıldıra, läkin anıñ demokratik quäte tulısınça açılıp betmäde, yağni, bu saylawnı tulı mäğnädä demokratik dip atap bulmıy.

"Namzätlärgä mäğlümät çaralarında tigez şartlar tudırılmawı bu saylawnıñ ğädellegen soraw astına quya" dide Gross.

Törkem äğzası, britan deputatı Nigel Evansta, Medvedev idarä quätlären qullanmağan bulsa da, ciñer ide, digän täesir qalğan. Döres, bu oçraqta anıñ östenlege azraq bulır ide. Evans Rusiä citäkçelärenä saylawçılarına nığraq ışanırğa, açığraq demokratik sistem buldırırğa kiñäş itte.

Medvedev: Bez Putin yulın saylarğa tieş

Bu saylawda Putinnıñ warisı Medvedev ciñäsendä berkemneñ dä şige yuq ide. Putinnıñ 8 yıl prezidentlığı yuğarı neft bäyäläre, iqtisadi üseş häm mullıq artu yılları dip taswirlana.

Tön urtasında Putin belän Qızıl mäydanda rok konsert qarawçılar aldına çığıp, Medvedev şuşı yuldan barunı däwam itergä çaqırdı:

"Bezneñ bu üseşne däwam itü forsatıbız bar. Totrıqlıqnı nığıtu, tormış sıyfatın yaxşırtu. İmanım kamil, bez şuşı yulnı saylarğa tieş" dide Rusiäneñ yaña prezidentı.

Obama: Bu saylaw irekle dä, ğädel dä tügel

Läkin bu dawamlıq dönyada ällä ni xuplaw tapmadı. Quşma Ştatlarda prezidentlıqqa demokrat namäztlärneñ ikese dä tänqitle fiker belderde.

Hillary Clinton Medvedevnıñ saylanu räweşen demokratiädän çigenü dip atadı.

Barack Obama, bu saylaw irekle dä ğädel dä tügel, dide.

Xökümät wäkilläre älegä räsmi belderü yasamadı, saylawnıñ räsmi näticäsen kötä.

Ä menä Yewropa basmaları inde xislären tıyıp tormıy. İtaliäneñ "La Stampa" gäzite, Rusiä demokratiäse Putin astında ğärip qaldı digän näticä yasıy.

Germaniäneñ "Süddeutsche Zeitung" basması Rusiädä demokratik protsesstan ber ni qalmadı, dip yaza.

Britaniäneñ "Financial Times" gäzite, Rusiädäge saylawnı demokratik dip ataw "demokratiäne kimsetü" bulır ide, dip yaza.

Döres, Yewropada Medvedevnıñ ciñüenä dan cırlağan başqala da bar, misal öçen, Belgrad. Serbiä premier-ministrı Voyslav Koştunica Medvedevnıñ ciñüen "böyek ciñü" dip atadı. Säbäben añlatıp torası yuqtır.

Medvedevnıñ prezident wazıyfasına kereşü tantanası 17 mayda ütäçäk

XS
SM
MD
LG