Accessibility links

якшәмбе, 4 декабрь 2016, Казан вакыты 19:28

Bu atna däwamında Rusiä prezidentı Dmitriy Medvedev yalda sanalsa da, İdel buylap urnaşqan şähärlärgä säfär yasap, anda qayber mäsälälärgä qarağan kiñäşmälär ütkäräçäk dip kötelä.

Prezidentnı Qazanda da kötälär, bilgele. Räsmi bulmağan çığanaqlardan kürengänçä, Medvedev Qazanğa 7 awgust könne kiläçäk. Anıñ monda qaysı cirlärdä häm närsälär eşliaçägen äle beräw dä belmi. Ämma prezidentnıñ nişliyäçäge bilgele bulmasa da, xalıq beraz borçıla. Medvedev Tatarstanğa alay-bolay Şäymiyevne almaştırırğa kilmi mikän digän şiklänülär bar. Qayber ütken fikerle säyäsätçelär isä, bu uñaydan üz farazların da äytä.

Ber yaqtan qarasañ, küptän tügel Tatarstanda premer-ministr Vladimir Putin bulıp kitte. Biredä ul Alabuğa maxsus iqtisadıy bülgesen qarap, respublikanıñ yaña mömkinlekläre belän tanışqan ide. Putin Tatarstanğa kilgäç, Medvedev ta qalışmasqa tiyeş. Ämma prezident monda iqtisadtan bigräk mäğärif problemaların öyränergä kiläder, di säyäsät belgeçe Räşit Äxmätov.

“Qayber belgeçlär Medvedev Qazanğa mäğärif buyınça kilä dilär. Miña qalsa, ul Qazan däwlät universitetın, Yaña Savin rayonında tözelä torğan, yaña texnologialär belän eşliaçäk mäktäpne qarar. Milli proyektalar buyınça eş alıp barğaç, möğäyen ul Qazanda Töbäqärä klinika diagnostika üzägenä dä barır. Bu Medvedev säfäreneñ tışqı yaqları. Çınlıqta isä, minemçä, Medvedev Şäymiev belän oçraşıp, milli problemalar turında söyläşäçäk. Küptän tügel Färit Möxämmätşinnıñ tatar-törek litseylarınıñ yabıluınıñ tiskäre küreneş buluı turında äytüe tikmägä tügelder, möğäyen şul turıda da süz barır. Älbättä monda milli komponentqa qağılğan sorawlar da quzğaltılaçaq”, di Räşit Äxmätov.

Turıdan–turı milli komponent eşläre belän şöğellänüçe Däwlät şurası deputatı Razil Wäliev isä, bügenge köndä yalda häm Medvedevneñ kilüendä ul ällä ni iskitärlek äyberlär kürmi. Ämma alay da prezident qatnaşında mäğärifkä qağılğan berär cıyılış bulğan oçraqta, milli qomponent turında hiçşiksez süz baraçaq, di ul.

“Tatarstan prezidentı Medvedevqa milli komponent uñayınnan xat yazğan ide, şuña kürä bu mäsälä kütärelmiçä qalmas. Ämma ul bu mäsälä buyınça ğına kilmäs, minemçä. Tatarstannıñ başqa kürsäter äyberläre dä bik küp, bügenge köndä. Uñışları da, problemaları da citärlek”, - di Razil Wäliev.

Mäğärif temasın däwam itep, Medvedevneñ Qazanğa kilüe, bälki mäktäplärdä din däreslären kertü belän dä bäyleder, di säyäsätçelär. Çönki säfär barışında prezidentnıñ Rayfa monastırenä baruı mömkin ikän.

Säyäsätçelär fikerençä, älbättä Medvedev Qazanğa kilep, iqtisad temasın da iskä almıyça kitä almıy. Berençe çiratta, bu söyläşülär salım sistemasına, Alabuğa iqtisadi bülgesenä qararğa mömkin. Şulay uq, ike prezident tarafınnan, küptän tügel matbuğatta şaw-şu kütärgän, Şäymievneñ, töbäk citäkçeläre qabattan saylana başlarğa tieş digän fikere dä tikşereler bälki. Şul räweşle Medvedev tağın ber qat üz yünäleşen tözüdä Tatarstan citäkçelegeneñ teläktäşlegen alırğa tırışa di, Räşit Äxmätov.

Medvedevneñ kilüe ser itep totıluı turında ul bolay dide.

“Yış qına Rusiäneñ däräcäle citäkçeläre kilgän waqıtta bu turında mäğlümat bik az bula. Citäkçelek xalıq qarşılıqlı fikerlär belän uram cıyınnarın ütkärer dip qurqa. Şuña kürä bu turıda soñğı säğättä genä xäbär itälär”, - di Räşit Äxmätov.

Boris Eltsin zamanında xökümät başlıqları Qazanğa kilep kitkännän soñ eşennän alındı. Mäsälän Sergey Stepaşin, Sergey Kirienko, Nikita Xruşçev. Ämma bu äle Qazannıñ zur xäkimnärgä zıyan itä digän süz tügel. Ul waqıtta Stepaşin, Kirienko, Xruşçev ta köymäläre qomğa törälgäç kenä köçle töbäklärgä barıp yärdäm sorap yörgännär, ämma soñ bulğan. Bu yulı Medvedevneñ Qazanğa kilüenä küplär optimistik qaraşta tora.

XS
SM
MD
LG