Accessibility links

дүшәмбе, 5 декабрь 2016, Казан вакыты 01:30

AQŞ prezidentlığına demokratlar namzäte Barack Obama bu atnada Yewropa buyınça säfären däwam itä. Obamamania Yewropağada taralırmı?

Obama Germaniağa kiler aldınnañ ilneñ tanılğan “Der Spiegel” jurnalı “Germania Superstar belän oçraşa” digän baş isem belän Obama fotosın bastırıp çığardı.

Äye, xäzer Yewropada Obamanıñ iseme Bushnıqınnan yışraq telgä alına başladı. “Obamamania” ağımı xäzer Yewropanı da urap aldı. Belgeçlär, demoqrat senatornıñ saylanuı Yewropa xalqı arasında AQŞqa qaraşnı üzgärtäçäk, dip farazlıy. Çönki AQŞ taríxında berençe tapqır afrikan-amerikalı beräw Aq yortqa saylanaçaq. Monıñ belän Yewropalılar Amerikanıñ demokratia säyäsätenä qarata ixtiramnarın yañadan arttıraçaq, dip farazlana. Yäğni bu adım Yewropalılar arasında Amerikanıñ asıl säyäsi nigezen täşkil itkän demokratia häm ireklek köçen tağın ber tapqır iskä töşeräçäk.

AQŞ belän Yewropa arasındağı mönäsäbätlär ölkäsendä belgeç häm Germania tışqı mönäbätlärendä AQŞ säyäsätçese Josef Braml, Obamanıñ tormış yulı Yewropalılarğa qızıq buluın äytä. Yäğni anıñ ätiseneñ Kenyädan kilep, Cansasta yäşägän aq tänle ber xatınğa öylänüe häm Obamanıñ bu ike üzgä millättän bulğan ğailädä tuuı, Yewropalılar arasında qızıqsınu uyattı, di Josef Braml.

“Amerika - demokratia, ireklek häm monı barlıqqa kitergän mömkinçelekläre belän mäşhür il. Yäğni anda prezident, yäisä yuğarı urınnarnı biläw öçen ätiegezneñ senator, yäki ğailägezneñ bay elitadan buluı şart tügel. Obamanıñ tormış yulı Amerika xıyalına turı kilä. Yäğni keşeneñ nindi ğailädä tuuına qaramastan, "tırış keşe ul, maqsatına ireşer" töşençäse östenlek itä. Bu Hollywood säxnälärendä eş qabatlanğan häm bez kürergä telägän ssenariy”, dip belderde Josef Braml.

Belgeçlär äytüençä, Yewropalılar AQŞqa ike küzlektän qarıy:

1. Köndäşlek öçen ber-bersen aşawçı, başqalarnı ixtiram itmiçä üz mänfäğäten genä qayğırtuçı.
2. Telägänçä ireklek, kiñ külämdä açıq mömkinçeleklär häm "bez buldıra alırbız" töşençäse ğämälgä aşqan il.

U.S. - Barack Obama listens to Democratic governors during a economic discussion, Chicago, 20Jun2008
Yewropalılar öçen Obama kübräk Kennedy misalında - yañalıq kertkän şäxes bularaq qabul itelä. Josef Braml äytüençä, Obamanıñ ğädi tormışı, Yewropalılarda aña qarata uñay qaraş tudıra.

“Şäxes bularaq Obama Kennedydän da qızığraq, keşelär aldında ul üzençälekle tormış mizgellären söyli ala. Kennedy bay ğailädä üskän, bu Yewropalılar öçen bik ğädäti küreneş. Obamanıñ isä üzgä ber tormış yulı bar”, Germania tışqı mönäbätlärendä AQŞ säyäsätçese Josef Braml.

Yewropada uzdırılğan fiker bileşü näticälärenä qarağanda, nöyäber aenda AQŞta bulaçaq saylawlarda qatnaşu mömkinçelegegez bulsa, kemgä tawış birer idegez digän sorawğa, Fransiadäge ölkännärneñ 64 % "Obamağa" dip cawap qaytarğan. Şulay uq, Obamanı saylağannar sanı Almaniada - 62 % , ä Angliadä - 60 %
XS
SM
MD
LG