Accessibility links

якшәмбе, 4 декабрь 2016, Казан вакыты 02:52

Tatarstannan baruçılar isemlegenä kergän yögereşçe Yılena Soboleva XXIX cäyge Olimpiä uyınnarında qatnaşa almayaçaq. Doping kontrole uza almağan 5 sportçı Olimpiä medällärennän mäxrüm qaldı.

Bilgele bulğança, Soboleva Rusiädän doping tikşerüe ütä almağan sportçılar isemlegenä eläkte. Ul 8 awgustta başlanaçaq Pekin Olimpiadasında 800 häm 1500 metrğa yögerergä tieş ide. Rusiäneñ sport belgeçläre äytüençä, ciñel atletikaçılardan Soboleva belän bergä doping kontrole uza almağan tağın 4 sportçı barsı da Olimpiä medällärenä ömet itkän bulğan.

Gölfiä Xänäfieva Rusiä ciñel atletika federasiase prezidentı Valentin Balaxniçev belderüençä, bu sportçılar doping kontrol testların almaştırıp quyuda ğäyeplänä. Şundıy uq ğäyepkä tatar qızı Gölfiä Xänäfieva dä duçar bulğan. Ul Tatarstan wäkile tügel. Yıraqlıqqa çükeç ırğıtuçı 27 yäşe tulğan Xänäfieva 2006 yılda Tula şähärendä bulğan yarışlar waqıtında çükeçne 77 metr 26 cm yıraqlıqqa ırğıtıp dönya rekordı quyğan bulğan. Ämma bu uñışın ozaq saqlıy almağan. 12 könnän soñ Jukovski şähärendä bulğan yarışlar waqıtında älege tör sport wäkile Tatyana Lisenko Xänäfiyevanıñ dönya rekordın yañarta. Xänäfiyeva 2006 yılda bulğan Yewropa çempionatında kömeş medäl ala. Ul Pekin Olimpiadasında Mäskäwdän Rusiä armiase klubı wäkile bularaq qatnaşırğa tieş ide.

Qayber basmalarğa küz salsañ, Tatarstan bu Olimpiadada üzennän 11 sportçı qatnaşa dip beldergän. Uzğan Athenada bulğan dönya uyınnarına qarağanda 3 sportçığa kübräk dip tä şaw bettelär. Baqsañ, çınlıqta sannar başqaçaraq ikän. Tatarstannıñ yäşlär eşläre, sport häm turistlıq ministlığında sport belgeçe Aynur Borhanov: “Dopingqa eläkkänçe bezneñ isemlektä 13 sportçı häm tağın ber östämä keşe bar ide. Menä anısın töşerep qaldırğaç, 12 häm tağın ber östämä digän süz bula inde”,- dide. Östämä sportçı bulıp ozınlıqqa sikerüçe Ruslan Ğataullin isemlekkä kertelgän.

İnde bilgele bulğança, yögereşçe Soboleva startqa çıqmayaçaq. “Ul bit Tatarstan wäkile tügel. Ä Tatarstan anı üz isemennän cibärergä telägän”,- digän sorawğa Borhanov: “Zaçetların monda tapşıra ul”,- dide. Annan da qala, qayber gazetalar yazuınça, älege 11 sportçı arasınnan Tatarstannan dip belderelsä dä tağın 4 keşe Pekin Olimpiadasına başqa töbäk wäkile bularaq baraçaq. Alar ike frontqa eşläsä dä, räsmi qäğäzlärdä uyınnarğa cibärüçe bularaq başqa töbäk kürsätelgän.

Şulay itep Olimpiadada çın Tatarstan wäkilläre- 6 keşe: uqçılar Mosin häm Deminä, yözüçe Martinova, ciñel atletlar Migunova häm Samitova-Ğalkina, sinxron yözü wäkile Elwira Xäsänova ğına çığış yasayaçaq. Bu sportçılar arasınnan Olimpiä uyınnarında qarşılıqlar aşa yögerüçe Gölnara Samitova-Galkina häm estafeta yögereşçese Yılena Migunova berençe tapqır qatnaşa.

Sınalğannar arasınnan uqçı Svetlana Deminä Sidneyda 2 urın, sinxron yözü ostası Elwira Xäsänova Athenada 1 urınnı alğan bulğan.

Tatarstannıñ yäşlär eşläre, sport häm turistlıq ministrı Marat Bariyev äytüençä, respbulika xökümäteneñ monnan 4 yıl elek qabul itkän qararı nigezendä, bu Olimpiadada altın medäl alğan sportçığa 50 meñ, kömeşkä layıq buluçığa 30 meñ, bronza yawlawçığa 20 meñ dollar qaralğan.
XS
SM
MD
LG