Accessibility links

якшәмбе, 11 декабрь 2016, Казан вакыты 09:14

Бер атналык сәфәр белән Үзәк Европа илләренә килгән британ шаһзадәсе Чарлз сишәмбедә Польшадагы татар авылына килеп, андагы мәчеттә булды һәм соңрак татар ашларын тәмләп карады. Кунак иткән як аны татар авылына Польшаның күпмилләтлелеген, диннәр татулыгын күрсәтү өчен чакырган.

Татар авылы дигәч тә уйга Пензадагы Әләзән, Чуашстандагы Шыгырдан, Оренбурдагы Татар Каргалысы, йә Татарстандагы Шәле, Карабашлар килә ала. Шулар рәтенә хәзер Польшадагы Крушиняны авылын да кертеп була – аның даны менә хәзер күтәрелә. Британиянең таҗлы шаһзадәсен сишәмбе көнне шунда кунак иттеләр.

Крушиняныда аны 50-ләп татар каршы алды, шулар арасында Польша мөфтие Томаш Миецкиевич тә бар иде.

Үзәк Европа сәфәре һәм татарлар


Чарлз Польшага җәмәгате Камилә (Камилла) белән дүшәмбедә килгән иде. Сәфәрнең беренче көне рәсми чараларга, президент Лех Качинский белән очрашуга багышланса, сишәмбедә британ шаһзадәсе күбрәк үз күңеленә яткан эшләр белән мәшгуль булды.

Татарларның Биелосток өлкәсендәге Крушиняны авылына килгәнче ул Биеловежа карурманына барып, Европада сакланган кыргый сыерлар (зубр) көтүен карап кайтты. Мәгълүм ки, Чарлз шаһзадә экологик проектлар белән бик актив шөгылләнә, мохитне саклау эшенә зур игътибар бирә.

Шаһзадә татар ашларын авыз итә
Шуннан соң инде британ тәхете варисы Польшаның Беларус белән чигендә урнашкан Крушиняныга юл тотты. Аны иң кызыксындырганы - Польша кебек 38 миллионлы католик илдә гасырлар буе мөселман мәхәлләсенең булуы, аларның үз мәчетләрен тотуы. Крушиняныда шундый гыйбадәтханәләрнең берсе тора.

Тәхет варисы татар мәчетендә


Җыйнак кына агач мәчет Польша җирләрендә сакланган иң борынгы мәчетләрдән санала, аның нигезе әле 19 гасыр башында ук салынган. Ул 10 чакрым ераклыкта яткан икенче бер татар авылы – Боһоникидәгесенең бүлекчәсе.

Мәчеттән чыккач британ асылзатын җирле татар Җәннәт Баһданович ресторанына алып килеп, татар ашлары белән сыйлыйлар. Җәннәт әфәнде сүзләренә караганда, Чарлзга татар пәрәмәчен, дөресрәге, аның җирле шәкелен “pierekaczewnik”не авыз иттергәннәр.

Польшада татар эзе тирән...

Татарларның берничә дулкыны хәзерге Польша, Литва һәм Беларус җирләренә 14-нче гасырдан алып килә башлый. Алар нигездә поляк патшалары гаскәрендә хезмәт иткән һәм тарихка үзләренең батырлыгы белән кереп калган. 17-нче гасыр азагында Польша патшасы Ян Собиецки татарларның шушы тугрылыклы хезмәте өчен аларга җир-утарлар бүлеп бирә, татарлар асылзат титулларын ала башлый.

Гасырлар буе тарихи ватаннан аерылып яшәү нәтиҗәсендә Польша татарлары ана телен югалта, әмма ислам динен саклап кала.

Крушиняны авылы татарларга 1679 елда бирелә. Бүгенге көндә Польшада 3 меңләп мөселман татар яши.

фикерләрне күрсәт

XS
SM
MD
LG