Accessibility links

дүшәмбе, 5 декабрь 2016, Казан вакыты 19:38

►Prezidentsız Tatarstan bulamı? ►Şäymiev Kolombialelär belän söyläşte ►“Gorod”qa tatar xuca kilde ►Törek uqıtuçıları qaytıp kitte ►Açıq mikrofon:Sez Tatarstannıñ üz prezidentı buluın telisezme?

--------------------------------------------------------------------------------------------

►Prezidentsız Tatarstan bulamı?


Düşämbedä qayber çığanaqlar Tatarstan prezidentı wazifası beterelä dip xäbär itte. Ämma Däwlät Şurasınıñ mäğlümat üzäge monı kire qaqtı.

Tatarstan däwlät şurası, Rusiä mäğlümat çaralarınıñ, ayırım alğanda gazeta.ru, Rosbalt, Exo Moskvı, NEWSru.com häm başqalarnıñ Tatarstan däwlät şurası konstitutsiagä üzgäreşlär kertü öçen cıyılaçaq, çirattan tış yül ayındağı utırışta şura taratılaçaq häm 12 üktäbergä yaña saylawlar bilgelänäçäk digän xäbärlären, döreslekkä turı kilmi, dip belderä. Matbuğat üzäge xäbär itüençä, federal' mäğlümat çaralarınıñ mondıy yazmaları uquçılar arasında döreslekkä turı kilmägän şaw-şu tudıra.

Däwlät şurasınıñ matbuğat üzäge xäbär itüençä, 27 yündä häm 11 yüldä bulaçaq utırışlarda 40tan artıq qanun ölgese qaralaçaq. Ayırım alğanda 2007 yılğı budjetnı qullanu turında qanun ölegese dä tikşereläçäk.

Rusiä däwlät dumasınıñ federasia häm töbäklär säyäsäte komitetı räise urınbasarı İrinä Yarovaya fikerenä kürä, qayber töbäklärdäge başqarma xakimiat oyışmaların bertörlelekkä kiterergä kiräk. Yänäse, xalıq şul uq isemdäge töbäk häm federal' başlıqlarnıñ närsä belän mäşğül ikänlegen añlap ta betermi.

“Gazeta” farazlarına kürä, Şäymiev misalınnan soñ Mäskäw qulı Başqorstanğa, Çuaşstanğa häm annan soñ Kavkaz respublikalarına da citäçäk.


--------------------------------------------------------------------------------------------

►Şäymiev Kolombialelär belän söyläşte

Tatarstan prezidentınıñ iqtisadıy qorıltay qısalarında Kolombia witse-prezidentı belän oçraşuı
Kolombia vitse-prezidentı Fransisco Calderon bu könnärdä Rusiägä 10 könlek säfär yasıy. Tatarstan prezidentı anıñ belän Peterburda oçraştı.

Säyääsätçelär bu säfärne, Rusiädä yaña prezident kilgäç säyäsi wäzğıyatneñ üzgärä aluı belän bäyli. Nik digändä, çönki moña qädär bulğan prezident Vladimir Putin Kolombianeñ köndäşe sanalğan Venesuella başlığı Hugo Chaves belän genä söyläşülär alıp barğan bulğan. Anıñ berniçä tapqır Tatarstanğa kilep, biredä küpläp xärbi boralaqlar alıp kitüe dä bilgele. Şuña kürä Tatartannıñ da Venesuella belän inde iqtisadı elemtälär urnaştırılğan ide.


Xärbi ölkädän tış Kolombia wäkile “Gazprom”, “Rosneft”, “Lukoyl” kebek tanılğan neft şirkätläre başlıqları belän dä oçraşqan.

Bügenge köndä Kolombiadä yılına 78 million tonna neft tabıla. Monnan tış bu ildä, şulay uq ğaz, kümer, timer, altın baylıqları küp. Älegä Rusiä belän Kolombia arasında yıllıq tovar äyläneşe 225 million dollar dip bäyälänä. Yaqın arada ike il başlığı da bu kürsätkeçne arttırırğa uylıy. Bu iqtisadıy elemtälärdä Tatarstan da üz öleşen kertep qalırğa tırışa.

--------------------------------------------------------------------------------------------

►“Gorod”qa tatar xuca kilde

Şamil Sadıyqovnı "Adımnar" jitäkçese bularaq xäterlilär. Tatar.ru fotosı
Reytinglı “Gorod” tapşıruına mödir itep transport ministrı süzçese quyıldı. Ul tapşırunı üzgärtsä dä, säyäsäten üzgärtmäs, dip farazlana.

"Efir" teleqänälınıñ yañalıqlar xezmäte (“Gorod” tapşıruı) direktorı itep Tatarstan transport häm yul xucalığı ministrlığınıñ cämäğätçelek, matbuğat belän elemtägä kerü sektorı mödire Şamil Sadıyqov bilgelängän. Anı qolleğälärı häm milli tamaşaçı isä "Adımnar" tapşıruınıñ "alıştırğısız jitäkçese" bularaq xäterli. Monı Matbugat.ru forumı da raslıy.


“Gorod” tapşıruı Qazan xalıq fiker söreşenä zur yoğıntı yasıy. Retinglarnı küzätep baram, täesir köçläre zur. “Efir” qanalı - kommersiale qanal. Şamil dä möxärriät säyäsäten üzgärter dip uylamıym. Şuña kürä milli temalarğa açıqtan-açıq yöz belän borılırlar dip kötmim. Milli tema - aqça kiterä torğan äyber tügel.

--------------------------------------------------------------------------------------------

►Törek uqıtuçıları qaytıp kitte

Vizası betkän törek uqıtuçıları Qazannan kitte. Biletları beryäklı. Düşämbedä Qazan aeroportına Tatarstan awıl-şähärlärennän ata-analar cıyıldı.

Ä şimbä könne başqalada uqıtuçıları belän räsmi sawbullaşu buldı. 165 mäktäptä qaytıp kitüçe möğällimnärne şähär çinovnikları, direktorlar, uqıtuçılar, uquçılar häm ata-analar yılap ozattı.


Şulay uq, Qazannan mäğärif idaräse citäkçese İlsur Hädiullin da kilgän ide. Uñışlı eşlägän uqıtuçılarğa diplomnar tapşırdı. Şul uq idarädän milli mäğärif cawaplısı Marat Lotfullin da bar ide. Ul da yıladı. “Alar kire qaytsın disäk, bu eşne xalıq qına eşli ala. Xalıq fikerenä il idaräse iğtibar itmi qalmas” , dide ul ömetlänep.

Sawbullaşu çarası tatar telendä bardı. Barı tik berniçä ata-ana ğına urısça söyläde. Şulay uq kürşe mäktäplärdän dä qunaqlar kilgän ide. Alar dusları öçen tatarça cırlar başqardı.

--------------------------------------------------------------------------------------------

►Açıq mikrofon:Sez Tatarstannıñ üz prezidentı buluın telisezme?

XS
SM
MD
LG