Accessibility links

чәршәмбе, 7 декабрь 2016, Казан вакыты 11:54

Xalıqara mäxkämä Sudan prezidentı Ömär Bäşirne keşeçelekkä qarşı cinayätlär qılu häm genotsidta ğäyepläde. Prokuror Bäşirne qulğa alunı sorıy.

Xalıqara cinayätlär mäxkämäse däwlät başlığına qarşı berençe tapqır qarar qabul itte. Mäxkämä 2002 yılda tözelde, ul Haağta urtaşqan. Sudan – mäxkämäne tanımağan illär arasında. Sudannıñ Darfur wilayatendä genotsidnı tikşerü häm ğäyeple bulğannarnı xökem itü – mäxkämä başlağan iñ berençe eşlärneñ berse.

Bügen başqala Xartumda meñlägän keşe prezident Bäşir häm qayber ministrlarğa qarşı uram cıyını uzdırdı. Protest belderüçelär yanına çığıp, Sudan ğädellek ministrı Ğabdel Basit Sabdrat, xalıqara cinayätlär mäxkämäse başlağan eşne BMO İminlek Şurası qararğa tieş bulaçaq, anı tämamlarğa waqıt küp kiräk bulaçaq, dip belderde. Uram cıyınına çığuçılarnıñ könbatışqa qarşı käyeflären sizep alıp, ministr mäxkämä tınıçlıqnı beteräçäk, dip belderde.

“Alar däwlät başlığın qulğa alıp tınıçlıq kileşüeneñ cimerelüen teli. Alar tärtipsezlek buldırıp, ildä säyäsi buşlıq tudırıp Abuca kileşüen beterergä, Darfurdan BMO häm Afriqa köçlären wä xalıqara oyışmalarnı çığarırğa teli,” dide ministr.

Ministrnıñ bu süzläre mäxkämä qararına yanaw kebek yañgradı.

Prokuror Luis Moreno-Okampo jurnalistlar aldinda
“Genotsidnı başlaw qararın Bäşir şäxsän üze qabul itkän. 2003 yılnıñ martında Bäşir Fur, Masalit häm Zağawa xalıqların yuq itärgä qarar qılğan,” dide Haağtağı mäxkämäneñ proqurorı Luis Moreno-Okampo.

Bügenge köndä Darfurda 9 meñläp BMO häm Afriqa Berlege ğäskärie bar. Bu köç anda tärtip saqlarğa bik citep betmi. Bäreleşlär däwam itä, mäxkämä qararı bulğan xälne tağın da qatlawlındırır, digän qurqu bar.

Xartumdağı xakimiätlärne küptän inde Darfurdağı qara tänle xalıqnı ezärleklägän Cäncäwid ğäräp ğisyänçıların yaqlap kilüdä ğäiplilär. Qorallı nizaqta 300 meñläp keşe hälaq buldı, 2 millionnan artıq keşe öylären taşlap kitte.

XS
SM
MD
LG