Accessibility links

Кайнар хәбәр

Törkiäneñ tışqı säyäsättäge yünäleşe üzgäräme?


Soñğı waqıtta Törkiäneñ tışqı säyäsättäge adımnarı xalıqara cämäğätçelek tarafınnan iğtibar belän küzätelä.Törkiä tışqı säyäsättä qaya taba borıla?


Törkiäne, Yaqın Könçığış, Fälästin, İzrail, Süriä, İran, Ğıyraq kebek illärdän alıp, Rusiä, Kavkaz, Qara diñgez illäre, Äfğanstan häm Pakıstanğa qädär cäyelgän kiñ geografik prizmada Amerika öçen möhim illärneñ berse, dip taswirlıy Amerikanıñ Hudson institutında Yewraziä säyäsät bülege başlığı Zeyno Baran.

Törkiä aldında tışqı säyäsättäge iñ zur kirtä ärmännär mäsäläse ide. 1915 yıl waqıyğasın ärmän diasporası tarafınnan qayber illärdä "genosid" dip tanıtu tırışlıqları däwam itä.

Törkiä isä Ärmänstan belän özelgän mönäsäbätne torğızu öçen Yerevanda söyläşülärne başladı. Läkin bu xäl qardäş il - Azärbaycanda rizasızlıq tudırdı. Soñğı könnärdä il matbuğatında Törkiäneñ Ärmänstan belän yaqınayu säyäsäte tänqıytlänä.

Törkiä kürşeläre belän mönäsäbäten yaxşırta

Törkiä räsmiläre isä bu yünäleşneñ Ärmänstan belän genä çiklänmäwen, Törkiäneñ tirä-yaqtağı barlıq kürşeläre belän küptännän özelep qalğan mönäsäbätlärne yañadan torğızu niyäte bularaq añlatma birä.

Şul uq yünäleştä Törkiäneñ İran, Süriä belän dä yaqınayuı kürelä.



"Törkiäneñ bu adımı isä, AQŞ häm Könbatış illäre arasında rizasızlıq tudıra kebek. Şul isäptän, Törkiäneñ bu säyäsäte üzenä kürä qatlawlı ber yünäleş dip atarğa bula", di töbäk belgeçe Zeyno xanım.



Törkiä häm yaña AQŞ xakimiate

“Obama xakimiate başqarğan tışqı säyäsätkä küz salğanda, anıñ pragmatik häm realist ber yünäleştä baruın kürergä bula. Anıñ Törkiä belän mönäsäbätlärendä dä bu sizelä. Törkiä Amerika öçen töbäk säyäsätendä möhim illärdän berse.

AQŞ şul isäptän NATO häm töbäktäge ähämmiätenä qarap, Törkiä belän mönäsäbätne yuğarı däräcädä saqlarğa tiyeş", di töbäk belgeçe Zeyno xanım.

Rusiä-Törkiä mönäsäbätläre

Küptän tügel Törkiä prezidentı Abdullah Gül Mäskäw häm Qazanğa räsmi säfär belän kilde. Ankaranıñ Rusiä belän mönäsäbätlären arttıru tırışlıqlarınıñ asılında ni yata?

“Törkiä öçen Rusiä könnän-kön ähämmiäte artqan illärneñ berse. İke il arasında milliard dollarlıq säwdä mönäsäbäte bar.

Monnan qala ike il arsındağı energia ölkäsendäge xezmättäşlek bik kiräkle. Şul isäptän ike il arasınsında “Zäñgär ağım” dip isemlängän energia planı bar”, Zeyno Baran.

Zeyno xanım süzlärenä qarağanda, älege waqıtta bu planğa yaña ber proyekt buldıru mäsäläse qarala. Bu xezmättäşlek ike taraf öçen dä bik otışlı bulaçaq.

Törkiä Rusiäne "Nabucco"ğa tartırğa tırışa


“Monnan qala bigräk tä Azärbaycan, Urta Aziä häm Yewropa öçen bik möhim bulğan energianı Törkiä aşa Yewropağa taşıyaçaq Nabucco energia proektı bar. Törkiä Rusiäne dä bu proyektqa quşarğa tırışa. İrannıñ da bu proyektqa quşılırğa teläwe turında süzlär yöri.

Törkiäneñ Rusiäne Nabucco proyektına tartu belän proyektnıñ strategik ähämmiäten häm eçtälege şaqtıy üzgärtäçäk. Proektnıñ AQŞ tarafınnan yaqlanuın küz aldında totqanda, Risiäneñ bu proyektqa quşıluı geo-politik tärtipkä zur zıyan kiterüe ixtimalın da arttıra”, digän qaraşta tora AQŞtağı Yewraziä belgeçe Zeyno Baran.
XS
SM
MD
LG