"Bälki Yewropa Berlegeneñ kiräge dä qalmas"

Törkiä prezidentı Abdulla Gülneñ kilüenä Eyfel manarası törek bayrağınıñ ike töse - qızıl häm aq belän bizälde. Şulay da säfärneñ eçtälege başqa töstä däwam itte. Mäğlüm bulğança, Fransia Törkiäneñ Berlekkä äğzalıq mäsäläsendä gel kirtä bulıp tora.

Monda ildäge köçle ärmän diasporasınıñ da zur täsire bar. Fransia prezidentı Nikolas Sarkozyneñ zamanında Törkiägä, Yewropa äğzalığına almaş "Urta Diñgez berlegenä" quşılu täqdime Törkiädä açu uyatqan ide.

Gül ike il arasındağı tarixi bäyläneşenä basım yasap säwdä äyläneşen arttırırğa çaqırdı. Törkiäneñ Berlekkä äğzalığı mäsäläsenä qarata isä ul, "barlıq şartlarnı tögäl tämamlağan, äğzalıqqa äzer Törkiäneñ soñınnan Norvegia kebek, min üz yulımda däwam itärgä telim, Berlekneñ kiräge yuq dip äytüe ixtimal" dip östäde.

Maç säyäsätenä däwam

Ärmänstan prezidentı Serj Sarkisiannıñ 14 üktäberda Törkiäneñ Bursa şähärenä bulaçaq säfäre aldınnan, şähärdä zur iminlek çaraları kürelä başladı.


Ärmän prezidentı Bursa şähärendä Törkiä belän Ärmänstan arasında bulaçaq maçnı qarıyaçaq. Prezident Abdulla Gül Bursa şähäre başlığına, Sarkisiannı qunaqçıl itep qarşılaw öçen barlıq çaralarnı kürergä quştı.

İminlek çaraları qısalarında provokator fanatlarnıñ stadionğa kereüenä yul quyılmayaçaq, azärbaycan bayraqları kertelmäyäçäk, säyäsi eçtälekle şiğärlärgä röxsät itelmiaçäk.

"Yähüdlär döres eşli"

Törkiäneñ tanılğan Yoldız texnik universitetında yaña uqu yılı başlaw uñayınnan çığış yasağan Törkiä premyerı Recep Tayip Erdoğan, yähüd eşquarlarınıñ aktivlığın maqtadı.

Yähüdlärneñ säwdä itüen ürnäk bularaq kitergän premyer, yähüd xalqınıñ "aqçanı teläsä närsä uylap qazanuına" basım yasadı.

"Alar başqalar kebek cıyılğan aqçağa öy alıp quyam äle dip uylamıy, alar aqçanı säwdägä qullana. Şulay da alarnın qaysısına ğına qarama iñ yaxşı cirlärdä yäşi. Nik? Çönki aqçanı öy alırğa qullanu alar fikerençä aqçanı israf itü", dip äytte.

Xalıq global iqtisadtan qanäğät tügel

Dönya bankı häm Xalıqara valuta fondınıñ İstanbulda uzğan yıllıq cıyınında protest çaraları tınmadı.
Cıyınnıñ açılışında çığış yasağan premyer Erdoğan, bu oyışmağa uramdağı protestlarğa qolaq salırğa kiñäş itte. "Ägär uramda keşelär global iqtisadqa qarşı çaralar kürä ikän, dimäk beraz uylanırğa kiräk - bez qayda xata qılabız", dip äytte.

Germania häm Gresiadäge saylawğa qaytawaz

Germaniadä Angela Merkelneñ Sosial-demokrat partiası belän tügel, ä uñçı irekle demokratlar partiase belän koalisia tözüe töreklärdä rizasızlıq tudırğan ide.

Şulay da ikençe atna Gresiadä bulğan saylawlar, Gresianeñ Trakia töbägendäge törek azçılıqları öçen uñaylı xäbär buldı. PASOK partiası başlığı Papandreou säyäsäte, uzğan atna prezident Gülneñ parlamentta yasağan çığışına awazdaş. Abdulla Gül "İl eçedäge törlelek qurqınıç tügel, kiresençä qazanış. Ber däwlät üz xalqınnan qurıqmasqa tieş" dip äytkän ide.

"Parlamentta raslanmasa, referendum bulır"

Premyer ministr süzçese Bülänt Arınç, AK partia xökümäte Törkiäne küptännän birle borçığan körd problemın çişü fikerendä nıq qararlı, ägär ul parlametta raslanmıy ikän, xalıq qararına yäğni refendumğa täqdim iteler, dide.

Törkiädä oppozisia partiaları xökümät planına qarşı kilä, alar monı Törkiä däwlätçelegenen nigeze dip sanlağan Atatürk qağidälären bozuın alğa sörä.