Ärmänstan kileşüe mäclestä

Törkiä tışqı eşlär ministrı Ahmet Davudoğlu Törkiä belän Ärmänstan arasında imzalanğan kileşüne millät mäclesenä täqdim itte. Kileşüneñ ähämiätenä tuqtalğan ministr: "Bu adım tarixta üz ezen qaldıraçaq", dip äytte.

Bilgele bulğança, bu kileşü milliatçe tarafta şaqtıy rizasızlıq tudıra. Mäclestäge Milliatçe xäräkät partiase MHP başlığı yärdämçese Oktay Vural, ärmän xärbiläre Qarabaxtan kitmiçä, çiklärneñ açılu qararına ayaq çalaçaqbız", dip belderde.

Azärbaycan belän artqan nizağnı bastıru öçen Törkiä tışqı eşlär ministrı bu atnada Azärbaycanğa räsmi säfär belän bardı.

Tışqı eşlär ministrı Ahmet Davudoğlu azäri xezmättäşe belän ber säğät çaması söyläşte. Mäğlüm bulğança, Azärbaycan Törkiägä açu itep ildäğı şähitlär mäydanındağı häm Törek ilçelege aldındağı Törek bayrağın alıp taşlağan ide. Mäğlümat çaraları isä ike il arasındağı bu kiyerenkelekne, ike qardäş arasında bula torğan ğädäti tartqalaşu bularaq telgä aldı.

"Ayrılık" serialınıñ qayber öleşe kiselde
Törkiä däwlät radio häm televidenie şirkäte TRTdä kürsätelgän, "Ayrılık" isemle serialdağı qarşılıq tudırğan küreneşlär filmnan çığarıldı. "Ayrılık" isemle serial İzrail belän Törkiä arasında şaqtıy qarşılıq tudırğan ide.

İzrail belän diplomatik nizağqa etärgän Fälästindäge xällär häm andağı xalıqnıñ tormışın çağıldırğan serialda İzrail xärbiläreneñ ber balanı ütergän öleşe filmnan çığarıldı. İzrail bu küreneşlärneñ İzrailğa qarşı näfrät tudıra alaçağın alğa sörä ide. Kino prodüsserı Selçuk Çobanoğlu "Milliyet" gazetına bu xaqta birgän äñgämäsendä İzrailnıñ ğäyepläwen kire qaqtı. Ul filmnıñ asıl maqsatınıñ mäxäbbät turında buluın assızıqladı. "Äle bu başı ğına, axırına taba äkiyät başqaça borılış ala", dip tä östäde ul.

İrannan kisätü

İzrailda zur Qarşılıq tudırğan film şulay ul Törkiä belän İzrailğa iñ küp qarşı torğan İran arasında da kierenkelek tudırdı. Film bilgele bulğança, İrannıñ Täbrez şähärendä töşerelde. Läkin film törkemenneñ çığımnarı turizm şirkäte tarafınnan tülänmägän. Bu säbäple İran tışqı eşlär ministrlığı Törkiägä burıçnı tüläw öçen diplomatik kisätü cibärde.

Yeropadağı PKK suğışçıları aqlanırğa qayta

"İlgä qaytu" isemle qarar nigezendä elek Yewropağa sıyınğan PKK terrorçılarınıñ 16sı İstanbulğa qayta. PKKnı yaqlağan Demokratik Xalıq Partiase Fransia, Germania, Belgia häm Şvesiadän kilgän suğışçıların zur tantana belän qarşı alırğa çaqırdı. Partianeñ ilgä qaytıp aqlanu alğan suğışçılarnı zur bäyräm belän qarşı aluı premer Tayip Erdoğan tarafınnan tänqitlände.

Erdoğan DTPneñ bu xäräkätenä qarşı yasağan çığışında, "Partia tarafdarları bu cawapsız xäräkät belän töbäktä kierenkelekne arttırırğa tırışa, läkin bez moña yul birmäyäçäkbez" dip äytte.

Törek dönyası belän strategik kileşü

Bu atnada Törkiädä Qazaqstan prezidentı Nursoltan Nazarbayev bulıp kitte. Qazaq başlığı Ankarada prezident Abdullah Gül tarafınnan qarşı alındı. İke prezident Ärmän kileşüennän alıp, Kavkaz säyäsätenä qädär törki dönyanı da qızıqsındırğan temalar turında söyläşte.

İke prezident soñınnan illär arasında xezmättäşlek turında räsmi protokol imzaladı. Älege kileşü ike il arasındağı xezmättäşlekne nığıtunı maqsat itep quya.