Accessibility links

Кайнар хәбәр

"Törkiäneñ säyäsi qiblası üzgärmi"


Törkiä tışqı säyäsättä yünäleşen üzgärtä digän farazlarğa cawap il premerı häm prezidentınnan kilde. Alar bu farazlarnı kire qağa.



Törkiä prezidentı Abdullah Gül bu atnada yasağan çığışında, Törkiäneñ üz yünäleşen däwam itüen häm bu yünäleşne başqa yaqqa üzgärtmäwen äytte.

Mäğlüm bulğança, soñğı atnalarda Törkiäneñ yaña tışqı säyäsäte häm anıñ yaña plannarı turında dönya matbuğatında şaqtıy xäbärlär taralğan ide. Törkiäneñ İzrail belän yaxşı mönäsäbätlärneñ kinät üzgärüe yazuçılarda Törkiä säyäsäteneñ üzgärüe turında bäxäslär uyattı.

Premyer Tayip Erdoğan, Törkiä tışqı säyäsi yünäleşeneñ könbatıştan könçığışqa taba üzgärüe turındağı farazlarnı kire qaqtı. "Bälki bez ğädättän tış säyäsi açılışlar yasaddıq, läkin bu Törkiäneñ Könbatıştan yözen boruwın añlatmıy", dip äytte.

Erdoğanga awazdaş prezident Gül: "Qayberäwlär Törkiäneñ Yaqın könçığıştağı äwzem säyäsätenä qarap, xäzer ilneñ yaña tışqı säyäsäte qaya borıla dip aptırıy başladı. Läkin eş anda tügel, Törkiä ni eşlägänen yaxşı belä", dip äytte.

Sudan başlığı äl-Bäşer Törkiägä kilä

Törkiädä bu yäkşämbedä uzaçaq Islam konferensia oyışması cıyınında dönya cämäğätçelegendä qarşılıq tudırğan citäkçe dä qatnaşa. İran prezidentı Äxmädinicät belän bergä Sudan başlığı Ğömär äl-Bäşer Törkiägä kilä. Sudannıñ Darfur töbägendä suğış cinayätçelegendä ğäyepli tabılğan äl-Bäşirneñ Törkiägä säfäre härwaqıt qarşılıq tudıra.

Törkiä räsmiläre xalıqara suğış cinayätçelege mäxkämäse tarafınnan äl-Bäşerne totqarlaw planı bulmawın äytte. Alar mondıy xäräkätneñ Darfurdağı tınıçlıq xäräkätenä zıyan kiteräçägen alğa sörde.

İkençe yaqtan, qayber belgeçlär Törkiäneñ äl-Bäşerne qulğa almawı anıñ "Afrikadağı iqtisadi mänfäğätenä" bäyle digän faraz belderde. 2006 yıldan başlap Törkiä Afrika qıytğası belän säwdäne 3 tapqırğa arttırdı.

Törkiä prezidentı Abdulla Gül febräl ayında Saxara tirälegendäge illärgä barğan berençe törek prezidentı bularaq, bu illärneñ citäkçeläre belän törle proektlarğa qul quyğan ide.

Törkiäneñ Afrika illäre arasında, ayırım alğanda, Sudan belän xezmättäşlege artqannan arta bara. Awıl xucalığı ministrı Darfurğa yasağan soñğı säfärendä älege il belän säwdäneñ soñğı 3 yılda 4 tapqırğa artuın äytte.

Çirat Gresiadä


"Taraf" ğazetı, Törkiäneñ kürşeläre belän problemalarnı beterü säyäsätendä xäzer çiratnıñ Gresiağa kilüen äytte.

Törkiägä yaqın säyäsäte belän tanılğan Papanderous
Mäğlüm bulğança, Egey diñgeze häm Kıbrıs nizağı säbäple ozaq yıllardan birle Törkiä belän kürşe Gresia mönäsäbätläre yaxşıdan tügel ide.

Süriä, Ğiraq, Ärmänstan kileşüennän soñ Törkiä premerı Tayip Erdoğan, Gresia premerı Yorgos Papanderousqa ike il arasındağı mönäsäbätlärne arttırunı taläp itkän räsmi xat cibärgän.

Älege xatta, "Törkiä xökümäte barlıq illärdä mönäsäbätlärne nığıtırğa teli. Bu xaqta urtaq mänfäğät häm taläplärne barlap bergä söyläşergä ide" dielgän.
XS
SM
MD
LG