Accessibility links

якшәмбе, 11 декабрь 2016, Казан вакыты 11:12

Törkiä prezidentı Abdullah Gülneñ Mäskäw häm Qazanğa yasağan räsmi säfärenä ike atna waqıt uzsa da, bu turıda törek gazetalarında fikerlär basılıp tora.

Gönül Pultarnıñ “Tatarstan cömhüriäten tanu” digän mäqäläse 20 febräldä “Radikal” gazetasında basılıp çıqtı. 22 febräldä isä professor İlbär Ortaylınıñ “Milliyet” gazetasında “Rus xalqı, könbatıştan ayırmalı bularaq, töreklärgä qarata tiskäre mönäsäbättä tügel” digän baş isemdä mäqäläse urın aldı.

Törkiä prezidentınıñ Rusiägä säfäre waqıtında İlbär Ortaylı 200 keşelek wäkilçelek arasında bula. Älege säfärdän qaytqaç, ul qayber fikerlären gazeta bitlärendä yazıp çığa. Anıñ mäqäläse ike öleştän (Rusiä häm Tatarstan) tora. Tatarstan öleşeneñ baş iseme “Tatarlar ruslar tarafınnan izelgän xalıq tügel” dip atala.

Älege baş isemdäge fikere avtornıñ biredäge şartlarnı bik ük belmäwe añlaşıla, läkin anıñ çit il keşese bularaq alğan täsirlären sanğa suqmıyça bulmıy.

Mäqälädä ul “Prezident Şäymiyev häm däwlät citäkçeläre Mäskäw Kremlı belän bik kileşüçän säyäsät alıp barğanlıqtan, respublikanıñ nefte häm aldınğı texnologiagä tayanğan baylıqlarınnan möhim ber pay Tatarstanğa qaldırıla. Bu isä biredä baylıq xasil itä”, dip yaza ul.

“Gül, Tatarstanda aldınğı qaraşlı xalıq yäşi, dip belderde. Anıñ bu süzläre isä Tatarstandağı möhim ber çınbarlıqqa işarä itä. İslam dönyasında muzıkadan tarixçılıqqa, säxnä sänğätennän injinerlıqqa xätle härber tarmaqta uñış qazanğan Qazan tatarları ruslar yanında izelgän häm idarä itelgän ber cämğeyät bulmadılar. Xoquqların yaqlaw häm xaqimiattä qalu öçen köç qullanıp qırıs çaralar kürmädelär, alar telägän maqsatlarına yaxşı xezmättäşlek belän ireştelär”, di.

Revolusia çorındağı törek-tatar Millät Mäclese räise bulğan professor Sadri Maqsudineñ onığı Gönül Pultarnıñ mäqäläsendä şul uq tema analízlanğan. “Şäymiev Qazan xalqına Mäskäwne açulandırmaslıq ireklek birä, Mäskäw dä ike arada qarşılıq buldırmasqa tırışa.

İke aradağı totrıqlı balans bulğanlıqtan, Şäymiyev 1991 yıldan birle prezidentlıq wazífasın üti. Şäymiev Mäskäwgä qarata tawışsız-tınsız, ämma ul üz köçen kürsätüdän dä totılıp tormıy.

Kapitalist yäşäw ısulına tınıç ber küçü buldırğanı öçen Şäymiyev xalıq tarafınnan bik yaratılğan şäxes. Ämma anıñ da yomşaq urını bar – ul da başqa citäkçelär kebek bayıp kitte. Bu isä anı Mäskäwgä qarata köçsez xälgä töşerde. Qayber yäşeren doqumentlar açılmasın öçenme, Qazandağı FSB agentları Fäwziä xanım yanına kerep çığudan tartınmıylar”, diyelgän mäqälädä.

Här ike maqälä dä Gülneñ Şäymiev belän oçraşuınıñ Törkiädä Tatarstannı tanıtuğa öleş kertüenä häm Qazannıñ Törkiä yärdämendä Mäskäw aldındağı roleneñ üsüenä işarä itälär.

XS
SM
MD
LG