Фирка бүлекчәләре җитәкчеләре елга яңа исем өстәде
25.02.2010
Быел Русиядә Укытучылар елы дип игълан ителгән. Башкортстанда шуңа өстәп, Республика елы игълан ителгән иде. Бер төркем фирка бүлекчәләре җитәкчеләре уртак утырышын үткәреп, аңа кайбер өстәмәләр кертте.
Әлеге утырышта Коммунистлар, "Гадел Русия", "Русия патриотлары", "Яблоко", Коммунист яшьләр бердәмлеге һәм тагын кайбер фирка бүлекчәләре җитәкчеләре катнашты. Утырышта "Бердәм Русия" фиркасе җитәкчелеге катнашмады.
“Башкортстан парламентындагы күпчелек “Бердәм Русия фиркасе кешеләре, - диде бу уңайдан Русия патриотлары башы Заһир Хәкимов. - Алар Башкортстанда быел республика елы дип игълан иттеләр. Матбугат моны республиканың мөстәкыйльлек турында декларация кабул итүгә һәм республика белән Мортаза Рәхимовның да нәкъ 20 ел идарә итүе белән аңлата. Без моның белән риза түгел. Безнеңчә, Республика елына караганда җиңүнең 65 еллыгы мөһимрәк. Шуңа без Җиңү елы дип тә өстәргә тәкъдим иттек”, диде ул.
Башкортстан Коммунистлары башлыгы Рифкать Гәрдәнов исә йомшаграк итеп шуларны ирештерде: “Без Укытучылар елына да, Республика елына да каршы түгел, ә бары тик Җиңү юбилееның да мөһимлеген искә алып, алары янына бу исемне дә өстәүне генә тәкъдим итәбез”, диде ул.
Заһир Хәкимов шәхси фикерләрем дип тагын шуларны ирештерде: “Бу үткән 20 ел Башкортстан татарларына әллә нинди зур куанычлар алып килмәде. Киресенчә, саныбыз кимеде. Мәктәпләр ябыла. Татар телен укыту елдан-ел түбән тәгәри. Шуңа Республика елы дип атаганчы, Җиңү елы дию татарларга яхшырак, минемчә. Башкорт булмаган башка милләтләр белән дә шулайдыр”, ди ул.